Here is the 'Neeyum Njaanum' Poem From the Malayalam Album 'Mannankattayum Kariyilayum' :)
Poem : Neeyum Njaanum
Penned by : Rajesh Athikkayam (email: athikkayam@gmail.com)
Recited by : Narayanan Krishna
Scored by : Joji Johns
orchestrated by : Sunil
Final Mixing : Team-G Records, Ernakulam
Studio : Pooja Ernakulam
Album : Mannankattayum Kariyilayum
Language : Malayalam
കവിത: നീയും ഞാനും
രചന: രാജേഷ് അത്തിക്കയം
പ്രണയിച്ചിരുന്നു നാം ഒരുനാളില്‍ ഈ മര-
ത്തണലില്‍ തളിര്‍ക്കുടക്കീഴില്‍.....
പ്രണമിച്ചിരുന്നു നാം ആ നാളില്‍ ആഴമാം-
സ്‌നേഹം പകുക്കവേ തമ്മില്‍.....
നിഴല്‍വീണവഴികളില്‍ മിഴിയോടുമിഴിനോക്കി-
രാഗം മൊഴിഞ്ഞു നാം നമ്മില്‍.....
ഒരു ലോകം, അതില്‍ നമ്മള്‍ മാത്രമായെങ്കിലെ-
ന്നൊരുപാടു മോഹിച്ചു മനസ്സില്‍.....
പ്രണയിച്ചിരുന്നു നാം ഒരുനാളില്‍ ഈ വഴി-
യരികിലെ മാവിന്റെ ചോട്ടില്‍.....
ഒരുമിച്ചിരുന്നു നാം കാറ്റില്‍ പൊഴിഞ്ഞതാം-
മാവിലകള്‍ മൂടിയൊരു കല്ലില്‍.....
ചുനയുള്ള പുളിമാങ്ങ നെടുകെ പിളര്‍ന്നു നാം-
ഉപ്പും പുരട്ടി കഴിച്ചു.....
പ്രണയമാം തേനിന്റെ മധുരത്തിലന്നത്-
മാമ്പഴം പോലെ രുചിച്ചു.....
നാണിച്ചിരുന്നു ഞാന്‍ നിന്നെയെനിക്കേറെ-
ഇഷ്ടമാണെന്നു പറയാന്‍.....
കാണിച്ചിരുന്നു ഞാന്‍ എന്നിഷ്ടമൊക്കെയും-
നോക്കിലും വാക്കിലുമെല്ലാം.....
ഹൃദയം തുളയ്ക്കുന്നൊരമ്പിന്റെ ചിത്രം-
വികൃതം വരച്ചു ഞാന്‍ തന്നു.....
കടലാസുതുണ്ടിലെ കടലോളമിഷ്ടം-
അന്നാദ്യമായ് നീ അറിഞ്ഞു.....
കാതോര്‍ത്തിരുന്നു ഞാന്‍ വളകിലുങ്ങുന്ന നിന്‍-
വര്‍ത്തമാനം കേള്‍ക്കുവാനായ്.....
കാറ്റേറ്റിരുന്നു ഞാന്‍ മിനുമിനുങ്ങുന്ന നിന്‍-
മുഖതാരകം കാണുവാനായ്.....
കസവുള്ള പട്ടിന്റെ പാവാടയിട്ടെന്റെ-
മുന്നിലൂടന്നു നീ വന്നു.....
അഴകുള്ള പെണ്ണിന്റെ മിഴിവുള്ള കണ്ണിന്റെ-
നോട്ടം കൊതിച്ചു ഞാന്‍ നിന്നു.....
മോഹിച്ചിരുന്നു നാം ഒരുനാളില്‍ ഈ മലര്‍-
വള്ളിക്കുടില്‍ക്കീഴിനുള്ളില്‍.....
ദാഹിച്ചിരുന്നു നാം ഒന്നിച്ചുപോകുവാന്‍-
പുള്ളിക്കുടക്കീഴിനുള്ളില്‍.....
മഴ മുത്തുകോര്‍ത്തൊരു കര്‍ക്കിടകസന്ധ്യയില്‍-
നിന്‍ കുടക്കീഴില്‍ ഞാന്‍ വന്നു.....
കുടയുടെ പാതിയും ഹൃദയം മുഴുവനും-
നിന്‍ ഇഷ്ടദാനമായ് തന്നു.....
മഴയായിരുന്നു ഞാന്‍ ഓരോ നിമിഷവും-
നിന്നെ അറിഞ്ഞൊരാ നാളില്‍.....
മഞ്ഞായിരുന്നു നീ ഓരോരോ മാത്രയും-
എന്നെ പുണര്‍ന്നൊരാ നാളില്‍.....
മഴമഞ്ഞിലൂടന്നു തെന്നിക്കളിച്ചു നാം-
ഒത്തിരി സ്വപ്നങ്ങള്‍ നെയ്തു.....
കണ്ണെറിയാതെ കരളറിയാതെ നാം-
ഇത്തിരി കുസൃതികള്‍ ചെയ്തു.....
വെയിലായിരുന്നു ഞാന്‍ നിന്നിളംമേനി രാ-
ക്കുളിരില്‍ തണുക്കുന്ന നേരം.....
മയിലായിരുന്നു നീ അദ്യാനുരാഗമാം-
പീലിവിടര്‍ത്തുന്ന നേരം.....
പ്രണയമാം തോണിതുഴഞ്ഞന്നു തമ്മില്‍ നാം-
സ്‌നേഹത്തിനാഴം അറിഞ്ഞു.....
മഴനൂറ്റനൂലിനാല്‍ ഭൂമിയും സ്വര്‍ഗ്ഗവും-
ഹൃദയത്തിനറ്റം അളന്നു.....
നിഴലായിരുന്നു നീ എന്നിലും എന്റെ രാ-
ക്കനവിലും നിനവിലുമെല്ലാം.....
തണലായിരുന്നു ഞാന്‍ നിന്നിലും നിന്നിളം-
മിഴിയിലും മനസ്സിലും എന്നും.....
ഇരുളിന്റെ വേദിയില്‍ വിരല്‍രൂപമായി നാം-
നിഴല്‍നാടകങ്ങള്‍ കളിച്ചു.....
പകലിന്റെ പാതയില്‍ വാകമരങ്ങളായ്-
പൂക്കള്‍പൊഴിച്ചു നാം നിന്നു.....
പ്രാര്‍ത്ഥിച്ചിരുന്നു നാം ദൈവത്തിനോടെന്നും-
നമ്മളെ ഒന്നാക്കി മാറ്റാന്‍.....
യാചിച്ചിരുന്നു നാം ലോകത്തിനോടെന്നും-
നമ്മളെ നല്ലതായ് കാണാന്‍.....
സ്‌നേഹത്തിനര്‍ത്ഥങ്ങള്‍ അറിയാതിരുന്നവര്‍-
നമ്മെയും തെറ്റിദ്ധരിച്ചു.....
നമ്മള്‍ പരസ്പരം വിശ്വാസമര്‍പ്പിച്ച-
നമ്മുടെ സ്‌നേഹം ജയിച്ചു.....
വരകളിലോടുന്ന വാക്കിന്റെ തീവണ്ടി-
കാത്തുകൊതിച്ചു നീ നിന്നു.....
കണ്ണാം കടലിലെ നോക്കിന്റെ കപ്പലില്‍-
കയറുവാനായ് ഞാനും വന്നു.....
അറിയാതെ നമ്മിലെ പ്രാണന്റെ രേണുവാം-
പരമാണുവില്‍ നമ്മള്‍ തൊട്ടു.....
ആത്മാനുരാഗമാം ആകാശഗംഗയില്‍-
ആത്മാക്കളായ് നാം അലിഞ്ഞു.....
കണ്ണായിരുന്നു നീ കണ്‍മണി എന്റെ ക-
ണ്ണെത്താത്ത കാഴ്ചകളിലെന്നും .....
കാതായിരുന്നു ഞാന്‍ കാതരേ നിന്‍ കാതു-
കേള്‍ക്കാത്ത കേള്‍വികളിലെല്ലാം.....
എന്നോ അകന്നൊരെന്‍ പെണ്ണേ അറിഞ്ഞുവോ-
അന്നേ അടഞ്ഞെന്റെ കണ്ണും.....
നിന്‍ കൂട്ടു വെട്ടി ഞാന്‍, നിന്‍ കൂടു വിട്ടുപോയ്-
കൂടെ നിന്‍ കേള്‍വിയും കാതും.....
നീയടുത്തില്ലാത്ത നേരങ്ങളില്‍ പ്രിയേ-
ഞാനെന്ന കല്പന പാതി.....
ഞാനരികത്തുള്ള യാമങ്ങളില്‍ പ്രിയേ-
നീയെന്റെ കോവിലില്‍ ദേവി.....
ഞാന്‍ പൂര്‍ണ്ണമാകുവാന്‍ നീ വേണമെന്‍ സഖീ-
നീ പൂര്‍ണ്ണമാകുവാന്‍ ഞാനും.....
സ്വന്തവും ബന്ധവും നാം തന്നെ മല്‍സഖീ-
നമ്മള്‍ക്കു നാം തന്നെയെല്ലാം.....
എന്‍ ശ്വാസമാണെന്റെ നിശ്വാസമാണു നീ-
അന്നുമെന്‍ ഓമനേ എന്നും.....
ആശ്വാസമാണു നിന്‍ വിശ്വാസമാണു ഞാന്‍-
എന്നത്തെയും പോലെ ഇന്നും.....
ഇന്നലകളെപ്പോലെ നമ്മളൊന്നിക്കുന്ന-
നാളെകള്‍ ഇനി വന്നുചേരാം.....
എന്നിലും നിന്നിലും പൂവുകള്‍ പൂക്കുന്ന-
കാലങ്ങള്‍ ഇനി വന്നുപോകാം.....
ഒരുപൂവു വിരിയുമ്പോള്‍ ഓര്‍ക്കുന്നു ഞാന്‍ നിന്റെ-
ചിരിയിലെ നഷ്ടവസന്തം.....
ഒരുപൂവു പൊഴിയുമ്പോള്‍ അറിയുന്നു നീ എന്റെ-
വിരഹദുഃഖത്തിന്റെ മൗനം.....
വേര്‍പിരിഞ്ഞെങ്കിലും നിന്റെയും എന്റെയും-
ഓര്‍മ്മയില്‍ നമ്മളൊന്നല്ലേ.....
മറക്കാന്‍ മറന്നുകൊണ്ടോര്‍ക്കുവാനോര്‍ക്കാം-
ഓര്‍മ്മ മാത്രം സ്വന്തമാക്കാം.....ഇനി-
ഓര്‍മ്മ മാത്രം സ്വന്തമാക്കാം.....ഇനി-
ഓര്‍മ്മ മാത്രം സ്വന്തമാക്കാം.....
15 сен 2024
