Taajirticha tokkotu bashannanaaf biicha dhaqe. biicha jechuu ni beeytan, qarqara galaanaa jechu. ilmaan isaatiifi jaartii isaa wajji biicha dhaqanii cirracharra fiigaa taphatan. namtichi tokko ammoo qarqaruma galaanaa san taa’ee qurxummii kiyyeessa. watya namtichi qurxummii muraasa kiyyeessee gara manaa galuuf ka’u, taajirtichi namticha kana yaamee dubbise. maal dalagutti jirta jedheen. qurxummii kiyyeessee galutti jira jedheen. guyyatti qurxummii meeqa kiyyeessita jedhee gaafate taajirtichi. quxummii muraasa anaafi maatii kiyyaaf gahu qofa kiyyeessa sanii ol maal itti godha jedheen. maaliif gowwaa taata. nama si gargaaru barbaadii qurxummii heddummeessii kiyyeessi. waan maatii keetiif gahu qofa hin kiyyeessin jedheen taajirtichi. heddummeessee maal ittiin godha jedheen namtichi hiyyeessi. magaalaa geessitee gurgurta kaa. mallaqa guddaa irraa argatta jedheen taajirtichi. achi booda hoo mallaqa san maaliin godha jedheen. borus akkasumatti heddummeessitee kiyyeessitee gurgurta. mallaqa walitti qabattee doonii guddaa bitatta. doonii guddaan bahara keessa deemtee qurxummii kumaatama kiyyeessitee biyya alaa ergita. mallaqa miiliyoona argattee akka kiyya taajira taata jedheen. eega taajira tahee hoo maal godha jedhee gaafate namtichi qurxummii kiyyeessu. kunoo nan agartuu, akka kiyya kanatti ilmaan tee guurattee bakka akkanaa dhuftee bashannanta. raahaa goota. jiruu gammachuu jiraatta jedheen. san taatu ammaa itti jiraamii; maatiin kiyya kunoo ollama kana jiran. yoo feete amma deemee fidee dhufuu dandaha. nuti torbanirraa asitti qaama dhiqanna. asitti huccuu miiccanna. ilmaan tiyya bakka kanatti taphataa oolan. waan ati ifaajee dheeraa booda itti dhaqqabde nuti duraa itti jirra jedheenii biraa deeme.
7 фев 2023