शरद पवारांची हवा नगरमध्ये कायम आहे. लोकसभा निवडणुकीला पुन्हा त्याचा प्रत्यय आला. त्यामुळेच आगामी विधानसभा निवडणुकीत, बारापैकी आठ जागांवर ते लढतील अशा चर्चांना हवा मिळाली. गेल्या आठवड्यात राष्ट्रवादीचे जिल्हाध्यक्ष राजेंद्र फाळके यांनी पुन्हा सस्पेन्स वाढवला. संगमनेर व श्रीरामपूर वगळता आमच्याकडे तब्बल १० मतदारसंघात उमेदवार आहेत, असं म्हणत त्यांनी ठाकरे गटालाही खिंडीत पकडले. शिवाय या १० मतदारसंघातून तब्बल २१ इच्छुक मुलाखती देणार असल्याचंही त्यांनी त्यावेळी सांगिततलं होतं. झालंही तसंच... याच गदारोळात फाळकेंनी एका मोठ्या चर्चेवर अनौपचारीक पद्धतीने शिक्कामोर्तब केले. ते म्हणजे, भाजपचा एक मोठा नेता लवकरच पवारांच्या गळाला लागणार हे त्यांनी सांगूनच टाकलं. आता फाळकेंनी इशारा केलेला हा मोठा युवा नेता यावेळी विधानसभा लढणार, हे जिल्ह्याला माहित होते. फक्त फाळकेंनी त्यावर अनौपचारिक पद्धतीने शिक्कामोर्तब केलं. आता हा मोठा नेता कोण..? देवेंद्र फडणवीसांना त्यामुळे कसा धक्का बसेल..? या नेत्याला रोखणे विखेंना शक्य होईल का..? या सगळ्या प्रश्नांची उत्तरे शोधण्याचा आमचा हा प्रयत्न...
10 окт 2024