#keralamanthrikam #yakshi #yakshini
യക്ഷി എന്നു കേൾക്കുമ്പോൾ പ്രേതമാണ് രക്തം കുടിക്കുന്നവളാണ് എന്നൊക്കെ പ്രചരിപ്പിക്കുന്നത് അത്രകണ്ട് ശരിയല്ല, ഉപദ്രവിക്കും ശരിയാണ്, പക്ഷേ ആരെ... ദുഷ്ടന്മാരെ അഹങ്കാരികളെ.... , പാവങ്ങളെ ഉപദ്രവിക്കുന്ന നിഷേധികളെ...
ആരാധിക്കുന്നവരെയും സ്വാത്വികരെയും ഈശ്വരവിശ്വാസി കളെയും എന്നും യക്ഷിയമ്മ രക്ഷിച്ചിട്ടേയുള്ളൂ . കള്ളമില്ലാത്ത ഭക്തിയാൽ തന്നെ ആരാധിക്കുന്നവർക്ക് എന്തും നല്കി അനുഗ്രഹിക്കുന്ന ദേവിയാണ് യക്ഷി . സ്ത്രീയെന്നു കേട്ടാൽ സർവ്വവും മറന്ന് കൂടെ പോകുന്ന സ്ത്രീലമ്പടന്മാരെ എന്നും യക്ഷിയമ്മ ശാസിച്ചിട്ടും പേടിപ്പെടുത്തിയിട്ടും ഉണ്ട് . ചിലപ്പോൾ അവരുടെ ജീവനെയും ഹനിച്ചിട്ടുണ്ട് . ദേശരക്ഷകയും ധർമ്മപരിപാലകയുമാണ്, പരാശക്തിയുടെ പതിനായിരക്കണക്കിന് അംശാവതാരങ്ങളിൽ ഒന്നായ യക്ഷിയമ്മ .യക്ഷന്റെ സ്ത്രീരൂപമാണ് യക്ഷി . " ഈ " എന്നാൽ സമ്പത്ത് . അതായത് ലക്ഷ്മി . ഈ രീതിയിൽ അമരകോശത്തിൽ പ്രഥമകാണ്ഠത്തിൽ സ്വർഗ്ഗവർഗ്ഗങ്ങളെ പറയുന്ന സ്ഥലത്ത് ( ശ്ലോകം 82 ) വ്യാഖ്യാനം കാണുന്നുണ്ട് .
അങ്ങനെ ചിന്തിക്കുമ്പോൾ യക്ഷി എന്ന പദത്തിന് ലക്ഷ്മി എന്നും അർത്ഥം വരും .ലക്ഷ്മിയുടെ തദ്ഭാവമാണ് യക്ഷി.
എല്ലാ യക്ഷി സങ്കല്പത്തിലും ദുഃഖത്തിന്റെ അല്ലെങ്കിൽ കൊടും പീഡനത്തിന്റെ ഒരു കഥ പശ്ചാത്തലമായിട്ട് ഉണ്ടായിരിക്കും . കാമുകന്മാരാലോ , പ്രബലന്മാരാലോ പീഡിപ്പിക്കപ്പെട്ട ശേഷം അതിദാരുണമായി കൊല്ലപ്പെട്ട സുന്ദരിമാരായ കന്യകമാരാണ് പ്രതികാരവാഞ്ഛയോടെ യക്ഷിയായി പിന്നീട് അവതരിക്കുന്നത് . ഉഗ്രവിഷമുള്ള പാമ്പിനെക്കൊണ്ടു കടിപ്പിച്ചും , ഗർഭിണിയായിരിക്കുമ്പോൾ തലയിൽ കല്ലെടുത്തിട്ടും ക്രൂരമായി വധിക്കപ്പെടുന്ന കന്യകമാർ അവരുടെ ജീവൻ പോകുന്ന സമയത്ത് നിസ്സഹായരും നിരാലംബരുമായി അമ്മേ എന്ന് ദിഗന്തം നടുങ്ങുമാറ് നിലവിളിക്കുകയും ആ വിളി ആദി പരാശക്തിയായ സാക്ഷാൽ ജഗദംബികയുടെ കാതുകളിൽ എത്തുകയും, കൊല്ലപ്പെട്ട ദേഹത്തിലെ ദേഹിയെ ( ആത്മാവിനെ ) പരാശക്തി സ്വീകരിക്കുകയും ദേവിയുടെ ചൈതന്യത്തിന്റെ അംശമായി ആ ആത്മാവ് മാറുകയും ചെയ്യുന്നു . പരാശക്തിയായ ദേവിക്ക് നിഗ്രഹിക്കുന്നതിനും അനുഗ്രഹിക്കുന്നതിനും ശക്തി ഉണ്ടല്ലോ.. ആദിപരാശക്തിയുടെ ചൈതന്യമായി മാറിയ ആ ആത്മാവിനും നിഗ്രഹാനുഗ്രഹക്തി ചൈതന്യം കൈവരുന്നു .
മനുഷ്യർക്ക് രണ്ടു ശരീരം ഉണ്ടല്ലോ . സ്ഥലവും സൂക്ഷ്മവും . സ്ഥൂലശരീരം ജഡമായി കഴിഞ്ഞാൽ ആത്മാവ് അവശേഷിക്കും . ആത്മാവിനാകട്ടെ ആഗ്രഹങ്ങളും പ്രതികാരവാഞ്ഛയും ബാക്കിയായി അവശേഷിക്കുന്നു . അവ പ്രാവർത്തികമാക്കാൻ സ്ഥൂലശരീരം ഇല്ല . ആയതിനാൽ ജീവിച്ചിരിക്കുന്നവരിൽ ആ ആത്മാവ് പ്രവേശിക്കുന്നു . ഇതിനെ പ്രതബാധ അല്ലെങ്കിൽ യക്ഷിബാധ എന്നു വിളിക്കുന്നു . അമ്മയുടെ അനുഗ്രഹവും ചൈതന്യവും ഉള്ളതിനാൽ ആ ആത്മാവ് യക്ഷിയായി മാറുന്നു . അത് ആദ്യം ചെയ്യുന്നത് തന്നെ കൊലപ്പെടുത്തിയവന്റെ കുലത്തേയും അവനേയും നശിപ്പിക്കുകയാണ് . അതിനുവേണ്ടി അവൾ പല ഉപദ്രവങ്ങളും ചെയ്തു തൻറെ പ്രതികാരം നടപ്പാക്കുന്നു.
ഇങ്ങനെ പ്രതികാര വാഞ്ഛയോടു കൂടി തന്റെ ശത്രുവിന്റെ കുലത്തെ മുച്ചൂടും നശിപ്പിച്ചിട്ടും കലിയും സങ്കടവും പ്രതികാരവും തീരാതെ കണ്ണിൽ കണ്ടവരേയും മറ്റും നശിപ്പിക്കാനും ഉപദ്രവിക്കാനും തുടങ്ങുന്നു . അനുഗ്രഹങ്ങളും നന്മയും നല്കാനുള്ള അനുഗ്രഹശക്തിയെ മറന്നു പോകുന്നു . കയറി കഴിയാൻ ഒരു ഇരിപ്പിടമില്ലാതെ പകലെല്ലാം അഷ്ടവിദ്യയാൽ ആരും കാണാതെ കഴിഞ്ഞു കൂടുന്നു . രാത്രി ആകുമ്പോൾ വിജനപ്രദേശം തന്റെ അധീനതയിലാക്കി വഴിപോക്കരെയും മറ്റും അംഗലാവണ്യത്താൽ ആകർഷിച്ച് വശത്താക്കി കൊല്ലുന്നു . ശല്യം വർദ്ധിക്കുമ്പോൾ ദേശവാസികൾ ഒത്തു ചേർന്ന് മന്ത്രധ്വനികളും , ആകർഷണം എന്ന മന്ത്രവാദസ്വാധീനവലയവും പ്രയോഗിച്ച് ഒരു നിശ്ചിത സ്ഥലത്തു ഈ ആത്മാവിനെ വരുത്തുന്നു . മാന്ത്രിക ക്രിയകൾ മുഖാന്തരം അവളോട് കാര്യങ്ങൾ പറഞ്ഞു മനസ്സിലാക്കുന്നു . ദുഃഖം സഹിക്കാവുന്നതിലേറെ ഉണ്ടെന്നും പ്രതികാരം മതിയാക്കണമെന്നും , നിഗ്രഹിക്കാൻ മാത്രമല്ല അനുഗ്രഹിക്കാനും സിദ്ധി ചൈതന്യമുണ്ടെന്നും ആ ആത്മാവിനെ ബോദ്ധ്യപ്പെടുത്തുന്നു .
പരാശക്തിയുടെ ചൈതന്യമാണ് നീ എന്നും ആശ്രയിച്ച് ഉപാസിക്കുന്നവർ എന്തു ചോദിച്ചാലും നല്കാൻ കഴിയുന്നവളാണ് നീ എന്നും... ആയതിനാൽ ഞങ്ങളെയൊക്കെ അനുഗ്രഹിക്കാനും , ദുഃഖത്തിൽ നിന്നും ആപത്തിൽ നിന്നും മുജ്ജന്മപാപങ്ങളിൽ നിന്നും ഞങ്ങൾക്കു രക്ഷയേകാനും യക്ഷിയമ്മയായി കുടിയിരിക്കണമെന്നും അപേക്ഷിക്കുന്നു . ഇനി മേൽ ഇരിപ്പിടമില്ലാതെ അലയണ്ട എന്നും നിനക്കായി ശ്രീകോവിൽ പണിത് അവിടെ കുടിയിരുത്തി യഥാവിധി പൂജകൾ നല്കി ഞങ്ങൾ പരദേവതയായും ദേശദേവതയായും കുടുംബദേവതയായും ആരാധിച്ചു കൊള്ളാമെന്നും വാക്കു കൊടുക്കുന്നു . ഇങ്ങനെ ആവാഹിച്ച് ആലയത്തിൽ പ്രതിഷ്ഠിച്ചുകഴഞ്ഞാൽ യക്ഷികൾ സാത്വികദേവതമാരാകുന്നു .
ആശ്രയിക്കുന്നവർക്ക് അഭയവരദയായി, മക്കളില്ലാത്തവർക്ക് മക്കളെ നല്കിയും, ധനവും വിദ്യയും ബുദ്ധിയും നല്കിയും ഭക്തരെ രക്ഷിക്കുന്നു.
ഭക്തജനങ്ങളോടുള്ള യക്ഷിയമ്മയുടെ വാത്സല്യത്തിന്റെ പ്രതീകമായി എന്നും ദേവിയുടെ വിഗ്രഹത്തിൽ ഇടതു കയ്യിൽ ഒക്കത്തു ഏന്തിയ രൂപത്തിൽ ഒരു കുഞ്ഞിന്റെ രൂപം ഉണ്ടായിരിക്കും .
ആദി പരാശക്തിയുടെ ധനദായക ഭാവമായ മഹാലക്ഷ്മി ക്ഷീരസാഗരത്തിൽ നിന്നും പാലാഴി മങ്കയായി അവതരിച്ച ചിങ്ങമാസം വെളുത്തവാവ് വെള്ളിയാഴ്ച തന്നെ ആണ് യക്ഷിയമ്മയുടെ ഇഷ്ടദിവസം .
യക്ഷിയെ യക്ഷിണി എന്നും വിളിക്കാറുണ്ട് . ക്ഷേത്രങ്ങളിൽ പ്രതിഷ്ഠിയ്ക്കപ്പെടുന്ന യക്ഷീരൂപങ്ങൾക്ക് സ്തബ്ധങ്ങളും നീണ്ടതുമായ കണ്ണുകൾ ഉണ്ടായിരിക്കണമെന്ന് അഗ്നിപുരാണം 50 -ാം അദ്ധ്യായത്തിൽ പറയുന്നു . തമിഴ്നാട്ടിൽ കുഞ്ഞിനെ അരയിലേന്തിയ രൂപത്തിലാണ് വിഗ്രഹപ്രതിഷ്ഠ . യക്ഷിയമ്മയ്ക്ക് നേദിച്ച പ്രസാദം കഴിച്ചാൽ ബ്രഹ്മഹത്യാ പാപത്തിൽ നിന്നും മോചനം കിട്ടുമെന്ന് മഹാഭാരതം വനപർവ്വം എൺപത്തിനാലാം അദ്ധ്യായത്തിലുണ്ട് .
K.P.SREEVASTHAV, a reputed kerala traditional astrologer, located at Alathur in Palakkad district, Predictions are done in english, Tamil or Malayalam languages. For more details or appointments contact:
Mobile: 09447320192
7 сен 2024
