***
Модарам дар шаҳр бо ман зиндагонӣ мекунад,
Зиндагӣ бар ман ҷафо, ӯ меҳрубонӣ мекунад.
Бо ҳавои тозаи деҳ баски одат кардааст,
Зиндагӣ дар шаҳр бар модар гаронӣ мекунад.
Чун нишинад ё бихезад, ҳар нафас ёди дигар
Аз падар в-аз рӯзгори подабонӣ мекунад.
Баски ҷамъ овард гулбаргу гиёҳ аз пуштаҳо,
Кулбаи ӯ бӯи зирку заъфаронӣ мекунад.
Мешавад дилтанг гоҳе андар ин шаҳри васеъ,
Ғусса дар дил, ханда дар лаб шеърхонӣ мекунад.
Вақти тифлӣ посбонам буд шабҳо то саҳар,
Бин, ки ҳоло ҳам маро ӯ посбонӣ мекунад.
Шаҳр хуб асту шароит хуб, аммо модарам
Гиряҳо бо ёди кӯҳистон ниҳонӣ мекунад.
Модари деҳотии ман дар чунин шаҳри азим
Зиндагонӣ не, ҳамоно қаҳрамонӣ мекунад.
То расам бар ҷамъи уммеди дили саргаштаам,
Аз Худо бар ман дуои сабзҷонӣ мекунад.
17 июн 2024
