اكبر أسباب معاناتك مع النرجسي انه مش متقبل انك احسن منه وانك مش متقبلة نفسك
عارفة مشكلة النرجسي ايه مع نفسه؟
انه متقبلهاش ولا تقبل عيوبها مقدرش يعمل دة وفي نفس الوقت مقدرش يتقبل ان انتي احسن منه وبتتفوقي عليه في حاجات كتير نفسيا أولا وعقليا ثانيا ، بالتالي النرجسي مبيعرفش يعيش في سلام ابدا ابدا لانه طول الوقت حاسس انه في صراع معاكي لانك احسن منه وهو مش عايز يحس كدة لان دة مصدر الإحساس بالعار عنده لانه علطول حاسس انه قليل ومش كافي وانتي بتزودي الإحساس المر دة عنده ،المهم ان في النهاية من ركائز الشخصية النرجسية عدم التقبل (عدم الرضا) وللأسف للأسف دي كمان ركيزة من ركائز الشخصية المتعاطفة والاعتمادية !!!! انتي اه انتي تخيلي ، بس مفيش مشكلة انتي أصلا مش واخدة بالك وانا حخليكي تاخدي بالك وتغيري وتتغلبي ع المشكلة دي ، وبما اننا مش حنعرف نحل المشكلة دي عند النرجسي فاحنا حنحلها عندك وكدة نبقى خلصنا من نصف المعاناة
عشان نفهم معنى التقبل حقولك على معادلة غريبة شوية خاصة بعلم النفس بتقول ايه ؟ المعاناة = الم X مقاومة
يعني ايه الكلام دة ؟ حديكي مثل يبين لك يعني ايه ، لو انتي رايحة اجتماع مهم وحصل انك اتعطلتي عشان الطريق واقف وانتي محبوسة في الطريق ، حالك ايه ؟ بتتألمي (غيظ ،او خوف ،او قلق ،... كل دة نوع من الألم) طيب المفروض ان السبب الحقيقي للالم هنا انك بتكرهي تتأخري في مواعيدك او خايفة من رد فعل مديرك ،او ... أي سبب المهم ان مفيش حل ادامك تقدري تعمليه ودة بيسبب لك الألم ، طيب المقاومة بقى ايه هي ؟ الكلام اللي بتقوليه لنفسك زي ( ايه اللي جابني من الطريق دة ، كنت مفروض انزل بدري اكتر من كدة . دي بقي المقاومة اللي بتتضرب في الألم وتعمل المعاناة ، كمان لما توصلي للاجتماع ومثلا مفروض حتعملي بريزنتيشن او عرض بروفايل يعني حتعرضي شغل في الاجتماع دة او حتسوقي لحاجة معينة المهم انك فجأة معدتك وجعتك وعقلك حيبدأ الحوار : انا مش مصدقة نفسي، مش كل مرة معدتي توجعني ، انا ليه مش قادرة أكون زي بقيت الناس الطبيعية واحضر الاجتماعات بدون أي قلق ، برضه هنا الألم هو احساسك بوجع معدتك ومقاومتك لام معدتك هو اللي بيسبب لك الرعب الزيادة وعدم التركيز ويعرضك اكتر انك تغلطي وانتي بتعرضي شغلك ،
الألم منقدرش نتحكم فيه (الناس الطبيعية) لكن اللي نقدر نتحكم فيه هو المقاومة للألم ، الألم طبيعي انه يحصل لكن رد فعلنا عليه هو اللي بيضخمه او يقلله او حتى يخليه في حجمه الحقيقي ، ازاي نتحكم فيه ؟ اننا نقلل الحوار السلبي فتقل المقاومة فتقل المعاناة.
من كل الكلام دة نقدر نفهم ايه هو التقبل؟
١- القدرة على رؤية الحقيقة بدون بدون اصدار احكام ( اللي حصل دة فظيع ، انا غلطانة ، كان لازم انزل بدري ، لازم أكون احسن من كدة ،.....)
٢- التقبل لايعني السماح بحدوث الموقف وقبوله
٣- التقبل مش معناه اننا منحاولش نتصرف او نغير ولا معناه التأقلم مع البؤس
التقبل هو نقطة البداية في التغيير زي ماقال كارل روجرز
تمرين : حاولي ترجعي لأهدافك او هدفك اللي حطيتيه في الحلقات اللي فاتت وقررتي توصلي له وفكري لو طبقتي التقبل في حياتك واتدربتي عليه هل دة حيساعدك في تحقيق هدفك ؟ وازي ؟ اكتبي الكلام دة في كشكولك
طيب تعالي نشوف بقى هل انتي بتتقبلي مميزاتك ونقاط قوتك ولا لا
اذا كنتي دايما تبصي لانجازاتك مهما كانت كويسة وتقولي طب ايه الفايدة او كل ماتحققي نجاح في أي مجال من مجالات الحياة وخصوصا لو مجال فيه منافسة زي مسابقة تلاقي نفسك بتقولي انا نجحت عشان مفيش حد غيري أصلا ، أي ترقية او مكافأة تيجي لك تقللي من قيمة انجازك وتقولي لو أي حد كان حياخدها يعني مش عشان انا شاطرة ولا عشان انا متميزة ، او لو لقيتي صديقة جديدة عايزة تقرب منك تقولي انا مش فاهمة هي بتحبني على ايه ؟ ، لو حد مدحك او مدح عملك او أي حاجة عملتيها ولقيتي نفسك بتنسبي الفضل لغيرك من البشر ، فكل دة بيقول انك مش واثقة من نفسك
فاكرة المقاومة اللي قلنا عليها ، دي ماشي مفهومة بنقاوم الألم ، لكن نقاوم المديح والسعادة لأننا حاسين اننا لا نستحقها ؟ ايوة دة بيحصل وخصوصا مع الشخصية المتعاطفة والاعتمادية ، دكتور باربارا بتقول ان النساء بيقاومن الاعتراف بنقاط قوتهمن اعتقادا منهن انهن مذنبات بالتفاخر والغرور اذا فعلن ذلك
تقبلي قوتك وكافئي نفسك على انجازاتك مع وضع نقاط ضعفك في الاعتبار
ازاي اعرف نقاط قوتي اللي بيها اقدر احارب النرجسي؟
تمرين
اكتبي المجاملات اللي بتتقال لك و التحديات اللي واجهتيها وتغلبتي عليها
وادوار مهمة قمتي بيها بنجاح ،( تدريس اولادك ، مساعدة أي حد من معارفك ، تمريض امك ، .... )
مهام مهمة اديتيها ( في شغلك ، او في عائلتك قضيتي مصلحة لحد ، ساعدتي حد ضعيف ، حفزتتي حد على انه ينجح ونجح بفضل نصايحك ، ...)
مهارات بتستمتعي باستخدامها بغض النظر عن الإنجازات فيها
لما تخلصي كتابة اقرأي اللي كتبتيه وحاولي تفكري كويس وتطلعي من اللي كتبتيه ثلاث نقاط قوة (عقلك سابق سنك وبتدي طاقة إيجابية ، التحديات :اللغة الإنجليزية
الأدوار :الحمد لله اولادي ناجحين عمليا ، مساعدة المرأة ، المهام :دراسة علم النفس ،المذاكرة والقناة ، ناس كتير حفزتهاونجحت بفضل الله، المهارات : القراءة والتحفيز وتقديم المساعدة ، نقاط القوة :الذكاء الحب المثابرة والإصرار والعزيمة )
ليه. احنا مش بنقبل نقاط قوتنا وبنستنكرها
١- بنخاف يتقال مغرورة او نكون متفاخرين ( فشخرة يعني)( مايشكر نفسه غير الشيطان )
٢- أحيانا بتشوفي الحاجة الكويسة فيكي عادية واي حد يقدر يبقي كدة لو حاول
٣- أحيانا تخافي تقولي لنفسك انا كويسة او بشتغل كويس لحسن تتغري وتكسلي وتبطلي تشتغلي ومتزقيش نفسك للاحسن
الباقي في اول تعليق
24 окт 2021
