ازاي النرجسي بيستغل احتياجك للعلاقة الحميمة عشان يذلك ويسيطر عليكي وازاي تكسبي المعركة دي وتخلصي من نقطة الضعف دي
٣- احتياجك للعلاقة الحميمة
أسوأ شيء ممكن يستغله النرجسي ضدك وان شاء الله كلنا حنتفرج عليه يوم القيامة وهو بيتعاقب ع الموضوع دة على رؤوس الخلائق ، لان دة اغتصاب الحقوق اللي ربنا مش بيسامح فيه ابدا
طيب في الدنيا بقى حنعمل ايه ؟
اول حاجة لازم توقفي اهتمامك بالعلاقة وتبطلي تحسسيه انك محتاجة لها لان هي دي المشكلة اللي بتقابلك انه يعرف نقطة ضعفك ويشتغل عليها خدي بالك الموضوع حياخد منك شوية وقت بس حيجيب نتيجة هايلة اذا النرجسي اللي معاكي مش خبيث ولا ثالوث ، انتي بدل ماتحسسيه انك محتاجة العلاقة وتبدأي تشتكي انه مهمل فيها ابدأي تحسسيه انك أصلا مش عايزاها وعندك مشكلة مش عارفة ايه هي وبيني له انك مرتاحة كدة اكتر ومفيش مانع انك تقربي منه جسديا باحضان بريئة دة اذا أصلا التقارب الجسدي هو سامح بيه ، المهم انك دايما تقولي له انك مش محتاجة العلاقة انتي محتاجة حنية وحضن بس ، ومتكونش محاولات التقارب الجسدي كتيرة ،مع الوقت تبدأي تفهميه ان الموضوع بقى مش فارق معاكي ولو طلبه تحسسيه ان مش فارق مفرحتيش ولا أي حاجة وتقضي اليوم بنفس طريقتك اللي متعودها منك بس تخفيها سنة بحيث هو يقتنع انك فعلا مبقتش فارقة معاكي العلاقة وبعد العلاقة تبدأي تحسسيه انك اديتيه حاجة مش هو اللي اداكي زي مثلا الجمل اللي هو متعود يقولها لك بعد العلاقة "أي خدمة " انتي بس اسمعي كلامي وانا حبسطك" الكلام المستفز اللي الحالات بتقول انه بيقولها لها بعد العلاقة من باب المن ، انتي كمان ابدأي تقوليها له بضحك وهزار وبعدين حتبقى بجد مع الوقت ، الغرض ايه من كل دة الغرض انك تخفي عنك نقطة ضعفك عشان توقفي استغلاله لها ومحاولة سيطرته عليكي بيها لانه بعد كدة بيعاقبك بمنعها وياخد منك فلوسك تحت تهديد منعها ،ويمنعك من اهلك برضه بالتهديد بمنعها ، ويحرمك من طلباتك ويقول لك انا مدلعك ومهنيكي وهكذا ،
الأسلوب دة حيمشي ويجيب نتيجة مع النرجسي الجسماني والنخبة لانهم بيحتاجوا للعلاقة وحيدوروا عليها ، اما في حالة العقلاني والضحية فدول ملهمش أصلا في العلاقة ولا اعتقد ان فيه امل للأسف واحيانا في الحالة دي الحالات بتضغط عليه وبتاخد حقها بالضغط والتهديد ودة برضه بيخليه يتلاعب بيها اكتر اذا كانت هي ضعيفة جدا .
٤- لو كانت نقطة ضعفك العيال
شوفي دي أسوأ نقطة ضعف بتكسر الزوجة ، عشان كدة لازم تكوني حكيمة جدا ، دلوقتي هو بيراقبك وبيلاحظك وحافظك جدا وعارف انتي بتميلي لمين في الأولاد اكتر وعارف انتي قلبك قاسي عليهم ولا حنينة ، وعارف انتي تقدري تبعدي عنهم يوم ولا اكتر ولا متقدريش وخصوصا لما بيكونوا لسة صغيرين ، فلما بيحس انك متعلقة بيهم جدا بيفهم طبعا انه من هنا يقدر يفرض سيطرته ، اللي هو انا حعمل اللي انا عايزهوانتي مش حتقدري تعترضي ،ليه عشان انا ممكن احرم اولادك من الامتيازات اللي بديها لهم بعضهم بيمنع الاكل عن الأولاد عشان يؤدب زوجته وعنها قبلهم طبعا ، وبعضهم مايصرفش عليهم عشان انتي تصرفي كل فلوسك لآخر مليم عشان عارف انك مش حتستحملي انهم يكونوا محتاجين حاجة وانتي متلبيهاش ، وبعضهم يبقى عارف انك مش عايزة الأولاد يعرفوا ان فيه مشاكل بينكم عشان صحتهم النفسية يقوم يتخانق مثلا في غرفتكم ولما متسكتيش او تتناقشي ويحس انه حيخسر يعلي صوته عشان يسمعهم ويضطرك تسكتي عشان ميحسوش ، ومنهم اللي بيتخانق ادامهم أصلا عندا فيكي ، ولو حس النرجسي انك خايفة على شكلك ادام اولادك حيضربك ادامهم ،ولو حس انك خايفة يسوأ سمعتك ادامهم حيقول عليكي انك بتعرفي حد وبتخونيه ، كمان بعضهم بيضرب زوجته ويشتمها ادام الالولاد ويحرضهم عليها ويقول لهم كان لازم اعاقبها عشان متعاقبكوش تاني ، والمصيبة الكبرى بقى لما يلاقي واحد من الأولاد نرجسي ويبدأ يسلطه عليكي ويؤذيكي بيه ، كل دة ليه لانه حس وعرف نقطة ضعفك . طيب ايه الحل ؟
الحل انك نقطة ضعفك دي اما تقضي عليه (لو كانت مثلا خايفة على شكلك ادامهم او خايفة على سمعتك او خايفة يكرهوكي ) يعني لو نقطة ضعفك الخوف لازم تتخلصي منه ولازم تكوني واثقة من نفسك وعندك يقين بربنا وعارفة انه مش بيضيع تعب حد ابدا وانك زرعتي بذرة نضيفة في ارض خصبة حتخرج لك شجرة طيبة ، متقلقيش ولا تخافي طالما اديتيهم حب كافي وسمعتي لهم وحليتي مشاكلهم وكنتي مصدر الأمان لهم متخافيش عمر ماصورتك حتتهز ولا عمرهم ماحيصدقوا ابوهم ،
اما بقى لو انتي نقطة ضعفك حبك وارتباطك وتعلقك بيهم فدي لازم تقلبيها في عين النرجسي رأسا على عقب ، يعني ايه يعني تفهميه انك تعبتي وزهقتي من العيال ومن ارفهم وكفاية كدة ويلهم انت وابدأي تحسسيه فعلا انك خلاص مش عايزاهم بس بالتدريج وبطريقة وكلمات ماتتمسكش عليكي ابدا عشان ميروحش يقول لهم امكم مش عايزاكم وخصوصا لو كانوا أطفال مش حتعرفي تتفقي معاهم ولا تفهميهم انتيب تعملي كدة ليه ، كان عندي حالة أولادها شباب كانت كل ماتتدخل لهم في أي مشكلة مع ابوهم كان يعند ويكبر المشكلة ولو ولد له طلب ويحس انها موافقاه على طلبه كان يعند وميديهوش اللي هو عايزه ، قلت لها تفقي مع الأولاد انك حتفهميه انك مختلفة معاهم وانك زهقتي واتخانقي معاهم ادامه وحتشوفي النتيجة ، وفعلا هو بدأ يهدي الدنيا مع الأولاد وبيحاول يقرب منهم ويصرف عليهم ببزخ وفي نفس الوقت مبقاش يهددها بيهم ولا يحاول يوقع بينها وبينهم والدنيا استقرت الى حد كبير ، اما بالنسبة للي أولادها صغار فدي بقي بتكون مهمتها اصعب ، بس فعلا اهم حاجة انها تشيل من دماغه فكرة انها حتموت لو بعدت عنهم لانه بالنقطة دي بيعمل كل ما بداله فيكي معتمد على انك عمرك ماحتطلبي الطلاق عشان الأولاد يتربوا في اسرة سوية ، او انه بيهددك انه حياخدهم منك ومش حتشوفيهم ، عشان كدة لازم لازم تحسسيه انهم مش فارقين معاكي وان الطلاق دة حاجة عادية جدا ،دي نقطة الضعف رقم ٥ حنقولها الحلقة الجاية
15 дек 2021
