النرجسي الخفي والاعيبه الغبية وازاي تتعاملي معاها
او ازاي تتعاملي مع الالاعيب الغبية بتاعة النرجسي الخفي الغبي
١- من الالاعيب المستفزة ان النرجسي يعمل نفسه مش سامعك وتكلميه مايردش عليكي ول ندهتيه بصوت عالي او ناديتيه لثالث مرة يرد ويقول لك ايه دة انتي بتكلميني اصلي مش سامعك في حين انه في العادي بيسمع الهمس ولو عايز منك حاجة لو كحيتي يقول لك انتيب تندهي لي ؟
شوفي ياستي النرجسي لما يكون متغاظ منك لاي سبب او حتى من غير سبب ومش عارف يعمل غضب نرجسي عشان خايف برضه لاي سبب مثلا انتي بقيتي قوية وبيقيتي مستبيعة ومهدداه انك تسيبيه وهو معندوش بديل ،او انه عايز منك مصلحة المهم انه مش قادر يفتري عليكي مؤقتا لسبب ما المهم بيكون له تصرفات مقرفة ومستفزة ومنها انه مايردش عليكي ، واحيانا يعمل كدة لمجرد انه عايز يحسسك انك مش مهمة وانه مش طايقك او مش عايز يكلمك او يحقر منك ، المهم اللي بيحصل انه هو نفسه لو أتكلم مع حد وماردش عليه بيغلي من الغيظ لانه بيعتبر دة عدم اهتمام وتقليل من شأنه فهو عارف ان الحكاية دي اد ايه بتضايق فبيعملها معاكي طيب تعملي ايه عشان تبطليهاله ؟ أولا ماتوجهيش له كلام نهائيا ،انا عارفة ان الموضوع صعب لكن بالتعود حتقدري ،فرغي طاقة الكلام اللي عندك مع اولادك او اخواتك او بأي طريقة بعيد عنه ووقفي توجهي او تبادري بأي كلام مع النرجسي خليكي بس تردي عليه فقط دا اذا كلمك وغير كدة انتي في صمت ودة حيغيظه بس مش حيعرف يمسك عليكي غلطة ، تاني حاجة بقى لما تكوني مضطرة تكلميه عشان تطلبي طلب للبيت او للأولاد حاولي يكون الكلام في حضور الأولاد لو كانو كبار وهو بيعمل حساب لنظرتهم له ، ولو لا يبقى ماتتكلميش غير لو هو قاعد مش بيعمل حاجة ولا ماسك الموبايل ولا بيتفرج ع التلفزيون يعني مايكنش عنده حاجة يتحجج انه ماسمعكيش بسببها ، وبعدين لما تبدأي كلام قولي له يافلان لو سمحت ،او بقول لك ايه يا فلان او ياحبيبي زي مانتي متعودة تتكلم معاه المهم انك تضمني انه بص لك وانتبه عشان مايسيبكيش تتكلمي وبعدين يقول لك ماسمعتش ولو انتي مضطرة تتكلمي كتير او تحكي حاجة تخص الأولاد دايما في وسط الكلام تقولي له انت معايا ولا لا او تحاولي تاخدي منه رد فعل يبين لك انه سامع يعني تحاصريه عشان تمنعي انه يستعبط ويعمل مش سامع ، ممكن بقى تعملي كل دة وبعد ماتخلصي يقول لك ايه معلش عيدي تاني عشان وقعت منك ، قولي له طيب ماشي حبقى أقول لك بعدين وانسي الموضوع ماتتكلميش فيه تاني الا اذا هو فاتحك فيه تاني واذا كان موضوع حيوي ومهم الجأي لابوكي او اخوكي في حله ،هو كدة كدة مش حيحل ولا يربط ولما يلاقيكي تجاهلتيه وحليتي الموضوع حيحس بالضعف بس في نفس الوقت حينبسط انك شيلتي من عليه مسئولية لكن في نفس الوقت انتيب تسحبي السجادة من تحت رجله وهو مش حاسس لانه بيبعد عن مشاكل أولاده ودي في مصلحتك ودة حيربط الأولاد بأهلك وحيكون صعب عليه بعدين انه يسيطر عليهم .
كمان لما تكوني بتناديه مثلا عشان الاكل او عشان يشيل لك حاجة او لاي سبب وانتي محتاجة انه يرد عليكي بسرعة علي صوتك وزعقي وكأنك بتندهي بقالك خمس مرات ولما يقول لك بتزعقي ليه قولي له بنده لك من الصبح زي ماهو بيعمل معاكي ، هو بينده لك بصوت واطي اللي قاعد جنبه مايسمعوش وبعدين فجأة تسمعي ندهة تخضك وتنططك وانتي مكانك ويقول لك بنده لك من الصبح ، عندي حالة بتقول لي ان بنتها قالت لها بابا كان ينده لك بصوت واطي جدا ويكلمك بصوت واطي وانتي بعيد عشان يقول لك انتي مابتسمعيش ويزعق ،يعني حتى مانكسفش يبان نصاب وافاق ادام بنته ودة من فرط غباؤه
خدي بالك لما تنفذي الكلام دة هو حيرجع يرد عليكي ويتجاوب معاكي فترة كويسة عشان يوهمك ان الدنيا تمام وبعدين فجأة يرجع تاني يعيد الطريقة وانتي تكرري نفس الكلام لحد مايزهق او روحه تزهق ونخلص ،استغفر الله العظيم من ذنبنا وذنبهم
من ضمن الحركات اللي الحالات بتشتكي منها انه يخليها بتتكلم في التليفون وينده لها بصوت عالي بمنتهى الصفاقة والوقاحة ويزعق لها انها بترغي في التليفون وسايبة أي حاجة في أي حاجة المهم انه يحرجها عشان تحرم تتكلم مع حد وتؤثر السلامة وتنعزل عن البشر ، اوعي تستسلمي وتعملي كدة ،انتي تقلبي الموضوع ضحك وتقولي له فلانة بتسلم عليك وبتقول لك خضيتها ، او تقولي له فلانة بتقول لي ايه دة هو جوزك بيعرف يزعق دا انا كنت فاكراه كيوت ولطيف ، دا بعد ماتقفلي ، او قالت لي ايه دة دة صعب ،او ايه دا دا انا كنت بحسدك عليه ، المهم انه يوصل له انه بوظ صورته ادام حد كان معجب بيه ، حيحرم يعملها بس حيستناكي تخلصي مكالمة ويعمل لك غضب نرجسي او صمت عقابي فالافضل انك ماتعمليش مكالماتك وهو موجود ابدا الا المكالمات السريعة عشان ع الأقل مايتصنتش عليكي ويعرف كل حاجة عنك
5 окт 2024
