ازاي تقدري تتوقعي النرجسي حيعمل ايه الخطوة الجاية ؟ .. كوثر سند 

ازاي تعرفي النرجسي حيعمل ايه الخطوة الجاية او ازاي تتوقعي النرجسي ؟
لما بتعوزي تعرفي الخطوة الجاية اللي حيعملها النرجسي بتبدأي تقرأي وتسمعي فيديوهات وممكن تسألي المتخصصين او حتى القريبين منك وممكن تراقبيه وتلاحظي تصرفاته عشان تعرفي حيعمل ايه الخطوة الجاية
المفاجأة بقى ان كل دة مش حيوصلك لحاجة ابدا ، انتي محتاجة تلاحظي نفسك وتشوفي نقط ضعفك ايه وانتي حتفهمي هو حيعمل ايه هو حيركز دايما على نقطة ضعفك وعلى حسب الموقف حيتصرف ، يعني مثلا انتي متمسكة جدا بشغلك وبتحاربي عشان تستمري فيه حيبدأ يهددك انه يقعدك في البيت ( فيه حالة كان كل خناقة يقول لها اقعدي من الشغل بالرغم من انه بياخد كل مرتبها ويديها مصروف ضئيل ، قلت لها قولي له ماشي حقعد من بكرة ، وفعلا قعدت كام يوم بلغت مرضي من وراه ولما لقاها نفذت رجع طبعا وقطع الصمت العقابي وراح يقول لها خلاص انا سامحتك ومهنتيش علي وارجعي شغلك وانا بضحي براحتي عشانك ومثل دور الضحية ) وطبعا حرم يقول لها اقعدي من الشغل ، نقطة ضعفك اولادك حيقول لك حطلقك واخدهم او لو حبيتي تغضبي حيقول لك امشي وسيبي الأولاد في حين انك لو عملتيها مرة حيحرم يقولها لك تاني بعد مايشوف العذاب معاهم ، وهكذا شوفي نقط ضعفك حتعرفي تتوقعي النرجسي .
ليه النرجسي بيحب يتشتم ، طبعا مش كلهم ؟
هو طبعا مش بيحب يتشتم ولا حاجة لكن هو بياخد فوايد من انك تشتميه ، اول حاجة انتي مش حتوصلي لانك تشتميه وتهزأيه غير لو وصلتي لمرحلة الانهيار والصراخ ودة طبعا وقود نرجسي سلبي ودة ماء المحاياة للنرجسي زي ما انتوا عارفين ، تاني حاجة انه هو مش بيكون سامع الكلام اللي بتقوليه أصلا ولا مهتم بمعانيه ومع ذلك بيسجله عليكي عشان يشتكيكي للناس ويقول عليكي مش محترمة وهو ياعيني صابر عليكي ، او برضه يقول للناس انه عايش مع واحدة مجنونة وانه مستحمل قلة ادبها وانه ضحية
** هل النرجسي نكدي بطبعه ولا هو بيمثل النكد ؟
هو أصلا النرجسي جواه اسود تماما يعني مشاعر كلها سلبية ، عنده إحساس مهول بالضعف واحساس مرعب بالخوف من الهجر ودايما شايف نفسه الحقيقية وفاهم مدى حقارتها وسؤها وكمان عارف ومتيقن انه خسيس وندل وجبان واناني ، هو داخليا عارف دة ولو حتى على مستوى اللاواعي ، وتلاقيه ساعات يقول الكلام دة بالنفي طبعا ، يعني ساعات يقول انا مش ندل من غير ما حد يقول له انه ندل ، يعني هو على مستوى اللاواعي عارف لكن على مستوى الواعي مخه بيرفض وينفي فورا كنوع من أنواع الحيل الدفاعية ، طيب لو شخص جواه كل الصفات السيئة وعارف انها فيه حيكون سعيد داخليا ؟ وكمان جواه الخوف المرضي من كل حاجة ، كل شيء مخيف بالنسبة له ، الموض الهجر الموت الفشل التغيير أي حاجة وكل حاجة بتخوفه دة بقى حيكون سعيد ؟ هو نكدي بطبعه لانه شايف كل حاجة سودا زي اللي جواه بالظبط فهو فعلا نكدي
السؤال الأخير مش حجاوب عليه بس حقوله من باب الفضفضة ، عضوة من أعضاء الجروب بتقول ان اختها اتجوزت جوز بنت خالتها اللي هو مفروض انه نرجسي وان اختها متهنية معاه ومش بيعمل معاها اللي عمله في بنت خالتها وسايبها تلبس قصير جدا (بمنتهى الفخر ) في حين كان بيمنع زوجته الأولى انها تلبس بنطلون (دا اللي هي بنت خالتها) المهم هي بتقول انها سمعت فيديو ليا بقول ان النرجسي بيعامل الثانية زي الأولى والتانية بتعاني زي الأولى بالظبط فهي بتقول انه التجربة اثبتت العكس ، بصراحة مش عارفة ارد عليها من أي اتجاه ، من اتجاه ان هي فرحانة باختها اللي خطفت جوز بنت خالتها ولا فرحانة ان النرجسي معذبش اختها ولا مبسوطة عشان التجربة الغريبة دي اثبتت عكس العلم مابيقول (لان انا مش بتكلم في الفيديوهات غير من كلام الدكاترة وكتبهم ) واللي هو ان النرجسي شخصية مستغلة وسامة ومؤذية لاي ضحية تقع في ايده ، مش عارفة أتكلم عن القيم والاخلاقيات اللي ضاعت ولا عن الجرأة والبجاحة في سرد موضوع عجيب في جروب كله ناس مجروحة وموجوعة . مش عارفة الصراحة ملقتش رد ارده عليها بس حسيت اني عايزة اشارككم او افضفض لكم عن حاجة احزنتني جدا ازاي واحدة تاخد جوز بنت خالتها وازاي اختها بتحكي بدون خجل
اكونت الفيس بوك
www.facebook.c...
جروب ادرس عدوك النرجسي
/ kawthersanad11