ازاي تواجهي النرجسي وتقولي لأ وتصممي تاخدي حقك
عايزين نتحسن ونبقى أقوياء ونواجه النرجسي ونقول لا وناخد حقوقنا
عايزين نعيش بني ادمين مش دمى ، عايزين نعيش بكرامتنا ، عايزة احس اني انسان له كيانه وبياخد حقوقه زي مابيعمل واجباته
صلحي نفسك ،رمميها ، ساعديها تشفى
تعالي نشوف كدة الامراض الجسدية بتتعالج ازاي؟
الدراسات بتقول ان الجسم هو اللي بيشفي نفسه ازاي امال الادوية اللي بناخدها دي بناخدها ليه ؟ حقولك .دلوقتي لما بتتجرحي جرح بسيط بتعملي ايه ؟ بتطهريه وتغطيه وتحافظي عليه من التلوث وبتلاقيه خف لوحده بدون علاج ليه؟ لان الجسم عنده القدرة على انه يصلح نفسه ،طيب لو اتلوث يعني ايه اتلوث يعني هاجمه مهاجم من براه بكتيريا او فيروس ايه اللي بيحصل؟ جهاز المناعة بيشتغل ويهاجم الفيروس او الميكروب ويتخلص منه ولو جهاز المناعة ضعيف بنضطر ندخل الدوا عشان يقتل هو المهاجم لكن هل الدوا بيصلح الجرح ويخليه يلتئم ؟لا الجسم هو اللي بيعمل دة يبقى العلاج بيساعد الجسم انه يصلح نفسه مش بيصلح الجسم .ولو الجسم فقد قدرته على انه يصلح نفسه مفيش أي علاج حيعمل له أي حاجة واكبر دليل على كدة الايدز انهيار جهاز المناعة ولا ادوية العالم كله تقدر تعمل حاجة في الحالة دي
طيب الجهاز النفسي والامراض النفسية بينطبق عليها نفس الكلام وبشكل اكبر واكتر ،لازم انتي تصلحي نفسك لازم عقلك يساعدك تصلحي جهازك النفسي وتخليه يبطل يعمل حيل دفاعية تؤذيكي وتوجهك للكسل والراحة والنوم وتقبل الحياة بلاحياة .
طيب انتي عايزة تقولي ايه دلوقتي؟
عايزة أقول لك كام خطوة تعمليهم عشان تقدري تعالجي جهازك النفسي اللي خربه انرجسي وخربته العيشة معاه وانتي كمان ساهمتي في تخريبه
١- اول حاجة للمرة الالف بقول لك لازم تكوني صادقة مع نفسك لازم تفهمي انتي ازاي وصلتي للي انتي فيه النهاردة وليه وصلتي له وهل كان لكي يد فيه ولا لا؟ وهنا اهم شيء لازم تفهميه ان مفيش شخص بيعيش مفعول به طول العمر ولازم كمان تفهمي ان عدم فعلك دة في حد ذاته فعل يعني ازاي يعني انتيب تختاري انك ماتعمليش حاجة والاختيار في حد ذاته فعل ، طيب خليني أوضح لك اكتر ،انتي النرجسي بيعاملك وحش وبيؤذيكي وانتي اختارتي انك تتجنبي الصراعات وتستسلمي وتسيبيه يعمل اللي هو عايزه لانك مش قادرة تواجهيه طيب انتي اختارتي ولا لأ اختارتي تستسلمي يبقى انتي هنا فاعل ،طيب ليه بتختاري تستسلمي ؟ لانك شايفة نفسك ضعيفة ولانك كمان شخصية اعتمادية وايه اللي خلاكي اعتمادية التربية طيب خلاص يعني مش بايدي برضه يعني برضه انا مفعول به ؟ لاااااا غيرك كان في مكانك واصبح غير كدة طيب معنى كدة انه اصبح فاعل بشكل إيجابي لكن انتي لسة فاعل بشكل سلبي
طيب تعالي نشوف اول مشكلة وقعتك في فخ النرجسي وخلتك ماتشوفيش العلامات الحمرا اللي كانت واضحة جدا في مرحلة اللافبومبينج ، اول مشكلة انك كنتي متعطشة للتقدير من الاخر لانك مش قادرة تحصلي على التقدير من جواكي فلما لاقتيه من النرجسي في الأول وقعتي في الفخ وكنتي صيد سهل جدا ، يعني انتي في علاقتك مع النرجسي فيه تبادل منفعة؟ انتي ايه رأيك؟ في البداية خالص كانت تعطش للتقدير والحب اللي اتحرمتي منه في بيت اهلك او في مدرستك او في مجتمعك وأول ما لاقيتيه عند النرجسي قبلتيه وطبعا بدأتي تمنحيه المقابل برضه واللي هو التقدير وانتي كدة سعيدة جدا ومكتفية لكن هو غير مكتفي وعايزك تديه التقدير دة بلاحساب بلا انقطاع دة غير باقي مشاكل النرجسي فلما هو بدأ يحس انك مش حتديه كل اللي هو عايزه او بدأ يخاف لاتكشفيه وتهربي فبدأ التحقير انتي فضلتي سارحة بخيالك في الحب الذهبي وازاي ارجعه ليه لانك عايزة التقدير تاني وبتحاولي توصلي له وانشغلتي عن التحقير والرؤية بقت مش واضحة ان هنا فيه اذى وبدأتي تتلخبطي لانك كل تركيزك ازاي ارجع للحب والتقدير دة . ايوة انتي مشوشة ايوة انتي أحيانا مش فاهمة لكن انتي مدركة ان فيه اذى وبتحاولي تتجاهليه لانك بتسعي ورا هدف مهم بالنسبة لك اللي هو التقدير وبيكون غالبا في صورة حب لانك متعاطفة مش نرجسية .
شوفي اذا مش منطبق عليكي الكلام تماما لان كل واحدة وشخصيتها وظروفها الا انك لازم تفكري وتشوفي انتي دورك كان ايه في العلاقة دي لازم توصلي لاخطائك اللي مكنت النرجسي من تحطيمك
اعيدي صياغة القصة بالعدل مع ذكر دورك لان اغفالك لدورك بيسلب عنك القوة وبيخليكي تتخيلي انك مفعول به وعمرك ماحتكوني فاعل ودة اكبر مصدر للضعف اللي انتي فيه ،
دي اول خطوة حنكمل الحلقة الجاية ان شاء الله
25 авг 2024