الندم بعد الطلاق من النرجسي 

رقم حجز الاستشارات والكورسات : ٠٠٢٠١١٥٠٥٨٦٠٥٢
خايفة وحيرانة واحيانا ندمانة
لما النرجسي حس بعدم خوفي منه لاني واجهته بخياناته ضربني ضرب مبرح وقبل كدة كان حاول يخنقني اكتر من مرة وطردني من بيتي وعملت له محضر وحاليا ماشية في إجراءات الطلاق لكن بحس اني خايفة ومحتارة وأحيانا اندم لانه كان بيحب أولاده
اول حاجة عايزة ارد عليها ولازم كلكم تفهموها ان النرجسي مش بيحب أولاده ، اذا احنا متفقين أصلا انه مش بيعرف يحب أصلا يبقى ازاي حيحب أولاده ؟ هو اهتمامه باولاده مجرد اهتمام بكائن لازم يكبر ويكون جميل عشان يجمل الصورة وخصوصا لو الأولاد صغال أطفال بيتشالوا وحلوين فمنين مايمشي بيهم الناس تعاكسهم وتلاعبهم فهم بيكونوا بالنسبة له زي التيشيرت الشيك اللي لابسه عشان يلفت بيه الأنظار ، ولما الطفل بيكبر شوية ويبدأ يبقى مش ملفت لنظر الناس فهو مش حيكون فرحان بيه زي الأول وفي نفس الوقت مجرد الطفل مايبان انه له رأي ويبدأ يكون مختلف عنه مش امتداد ولا ظل له حيبدأ يكرهه واذا الطفل ماكانش على المستوى اللي هو عايزه من الكمال هو حيبدأ يسيء معاملته ويشتغل معاه سخن بارد عشان يسيطر عليه ويكسره عشان يفضل امتداد له ، المهم انه بيبدأ يؤذيه جدا وفي الظاهر بيكون ادامك بيعامله احسن معاملة ويدلعه ويجيب له اللي هو عايزه وبيعمل دة لاسباب كتير ،أولها يحسسك بعدم قيمتك اذا الأطفال اهم منك و يخلي الأولاد دايما في صفه عشان في يوم من الأيام يضغط عليكي بيهم ، فهو بيستغل أولاده في حربه ضدك وبيستخدمهم استخدام الالة او المكنة بلارحمة ولا ادمية ،ازاي بقى يكون بيحبهم ؟ اذا الحب في عرفك هو اللعب والحاجات الحلوة فانتي كدة مش فاهمة ازاي مفروض يكون حبنا لاولادنا ،الحب مش اهتمام جزء من الوقت ولا تواجد شوية وخلاص الطفل محتاج تواجد دائم واحساس بالأمان ولو هو بيحب أولاده هل هو موفر لهم بيئة هادية وآمنة ، هل اولادك حاسين بالأمان سواء وهو موجود او وهو مش موجود لو هو بيحبهم ازاي بيزعق ويعمل غضب نرجسي وهم موجودين ازاي يضربك ادامهم او يحقرك ادامهم لو هو بيحبهم مش مفروض يعرف ايه اللي بيؤذيهم ويبعد عنه مش مفروض يحافظ على صحتهم النفسية عشان مايطلعوش مرضى نفسيين ؟ فين الحب اللي بيحبه النرجسي لاولاده ،فكري بالراحة وركزي على تصرفاته معاهم والسخن بارد والاختفاء اللي بيعمله معاهم عشان يعلقهم بيه بشكل مرضي ،فكري في تصرفاته ادامهم ،
خوفك امر طبيعي جدا وعادي وحيختفي بعد الطلاق بفترة لما تلاقي ان الحياة مشيت والدنيا ماوقفتش وانتي مامتيش ولا اتسجنتي في بيتك ولما تعملي صداقات جديدة وتدخلي الحياة النظيفة الخالية من سموم النرجسي ، القلق هو الخوف والخوف هو القلق ودة لما بيكون بنسب متوسطة فهو صحي جدا ودافع لكي انك تطوري نفسك وتطوري حياتك وتجتهدي وتعيشي حياة صحية . لكن الأسوأ من الخوف والقلق هو الندم ابدا ماتندميش على انك سيبتي النرجسي لان دي اصح خطوة بتعمليها في حياتك لانكب تحمي اولادك من الامراض النفسية وحتحمي نفسك من الحياة المسمومة اللي انتي عايشاها ، ماتندميش لانك هربتي من السجن وخدي بالك ان ندمك دة ناتج عن بقايا أفكار النرجسي اللي موجودة في مخك في اللاواعي ، انك علطول مذنبة وانك مش بتعرفي تاخدي قرار وانك أصلا مابتعرفيش تعملي أي حاجة في الحياة وبالتالي مش حتقدري تعيشي من غيره وانك بتسيئي التصرف ومش حتعرفي تربي الأولاد من غيره لانك أصلا فاشلة ومش مربياهم كويس ، كل دي أفكار النرجسي زرعها في عقلك عشان لما تاخدي الخطوة اللي اخدتيها دي تخافي وترجعي تجري عليه وابدا ماتسيبيهوش ولا تقدري تفتحي بقك أصلا معاه بعد كدة لانك حتخافي يسيبك وتستمر رحلة الاذلال والضرب والاهانة وفي الاخر يطلعوا الأولاد نرجسيين او مرضى نفسيين
#النرجسي #الحرب #التعايش #الخداع #اللؤم #الكتمان #الحماة #النرجسية #القوة #الذكاء #مشاكلـزوجية #زواج #ازواج #زوجات #اسرة #اسرية #الخفي #النرجسيالخفي #حبينفسك #كونيملكة #القوة #الثقة #الاكتئاب #الصحة #النفسية