الانتساب إلى هذه القناة للاستفادة من المزايا:
/ @user-id-kawthers-sanad
حجز الاستشارات : kawtharsanad.com/
رقم واتساب ٠٠٢٠١١٥٠٥٨٦٠٥٢
تأثير كبت المشاعر على العلاقة الزوجية
هو جوزي نرجسي ولا هو مش بيعرف يعبر عن مشاعره اصله جاي من اسرة عندها جفاف عاطفي
ايه تأثير كبت المشاعر على العلاقة الزوجية ؟ عشان نعرف دة لازم نعرف تأثير كبت مشاعرك عليكي انتي شخصيا وعلى زوجك والعكس
دلوقتي لما تكوني عايشة مع واحد مش بيعبر عن مشاعره وكل ماتقولي له انك محتاجة تسمعي منه كلام حلو اللي هو علميا عايزة تسمعي او تعرفي مشاعره تجاهك كنوع من الطمأنة والاحساس بالأمان وكمان كأشباع عاطفي لكي تلاقيه بيقول لك انه من اسرة جافة مايعرفوش لا أحضان ولا قبلات ولا تعبير حتى بالكلام وماحدش أصلا حضنه ولا حس بحب ابوه وامه واحيانا يعيش دور الضحية ويحسسك انك لازم تعوضيه عن حب اهله اللي هو ماعاشهوش وان انتي مطالبة تقولي له كلام حلو يعني انتي اللي لازم تعبري له عن مشاعرك عشان هو مش بيعرف واحيانا النرجسي يقول لك دي إمكانيات انا ماعنديش الامكانية دي وانتي عندك يبقى انتي اللي تعمليها
الفكرة بقى ان الانسان السوي اللي مش بيعرف يعبر عن مشاعره بالكلام بيعبر عنها بالاحضان فعلا او بالافعال الحقيقية تلاقيه جنبك طول الوقت ماسك ايدك يطبطب وهو رايح وهو جاي بيسمع لك لما تتكلمي وبيسمع بشغف وبدون ملل انما النرجسي مدعي الحب لا بيعبر لا بالكلام ولا بالافعال ولا بيسمع لك ولا بيطيقك ولا بيطيق نفسه أصلا ، هو بس بيقول كلمات تافهة زيه لما يكون عايز منك حاجة ، طيب دة ايه تأثيره عليكي؟ دة في حال انك مدمناه ومتعلقة بيه انك حتبدأي تحتاري هو ليه مش بيحبني هو انا فيا عيب ولا انا ناقصني حاجة وطبعا هو مش بيتأخر هو بيطلع فيكي كل العيوب فانتي تبدأي تصدقي بعضها خصوصا لو كان حد في طفولتك بيقولها لك وهنا بتنهار ثقتك بنفسك ، ودي اول الخساير اللي بتحصل بعد كدة لان لما ثقتك بنفسك تنهار حتبدأ الغيرة تنتعش جواكي واي حد واي معزة يبص لها انتي حتتهزي وتقلقي ، وندخل في الشعور بعدم الأمان والقلق وشوية شوية بينقطع التواصل بينكم او بيقل جدا ويبقى محدود بالاولاد وماشابه ومن هنا بتبدأي تحسي بالوحدة والعزلة العاطفية ،وندخل بقى في دايرة الإحباط اللي بيوصلنا للاكتئاب وتبدأ بقى سلسلة الامراض النفسية والجسدية .
ياااه كل دة بسبب ان الزوج مش بيتكلم ومش بيعبر عن مشاعره ؟ ايوة لان العلاقة الزوجية فيها ضغوطات ومشاكل وربنا خلقها بالشراكة يعني اتنين يعملوها ويعيشوها مش تلقيح واخصاب وخلصنا والام هي اللي تربي زي الحيوانات ومش كل الحيوانات حتى فيه حيوانات بتعمل اسر وتتشارك المسئولية ، لا ربنا خلقنا نتشارك الحياة ولما الحياة تتقلب فرداني زي مابيقولوا سينجل مام مش بيكون فيها جانب لشحن الطاقة العاطفية والنفسية اللي مفترض الشريكين بيحصلوه من بعض ،
مين بقى المتضرر هنا انتي واولادك وبس لان النرجسي أصلا مش محتاج الشحن دة هو أصلا جمد مشاعره وكبتها واثرت عليه نفسيا واصبح مضطرب واحيانا مش واعي أصلا باللي عمله في نفسه فهو أصلا ضايع وبيضيعك انتي واولادك معاه
الفكرة هنا انك بتتلخبطي لما بيقول لك اعذاره انه مش بيعرف يعبر عن مشاعره وانه جاي من عيلة جافة المشاعر وانه ماتعلمش الكلام دة فكل دة كلام ماتصدقيش منه حاجة لان اللي بيحب وعنده مشاعر مستحيل مايعرفش يعبر عنها لكن هو فعلا معدوم المشاعر وهو فعلا نرجسي اذا مش بيعبر عن مشاعره ولا بيسمع لك ولا بيتناقش معاكي بمنطقية وبيعمل صمت عقابي او غضب نرجسي وفيه باقي صفات النرجسي فهو نرجسي فماتتلخبطيش ،حقولك دليل بسيط جدا على انه كداب ،اول ماعرفك وهو بيحاول يقنعك انك تقبليه او بعد ماخطبك صالونات وبدأ يقرب منك ويعلقك بيه كان ازاي مش كان بيعرف يعبر ولا كان مكتوم برضه ولو كان مكتوم كان بيحاول يسمع لك ويتناقش معاكي ولا لا ماهو مستحيل يكون من اول يوم سيء ماكنتيش قبلتيه أصلا ، طيب يعني هو بيعرف يتكلم ويعبر وبيعرف يستوعبك ويحتويكي وكان بيعرف يسمع لك لو كلمتيه وكان بيعرف يتكلم في التليفون بالساعات وكان حابب كل حاجة بتعمليها وموافق عليها وماكانش بيعترض على حياتك ولا صاحباتك ولا اهلك وكنتي بالنسبة له اميرة الاميرات ولا لا؟ وبعدين ايه اللي حصل ؟ اللي حصل انه اول مادخلتي بيته اتقلب ١٨٠ درجة ومفيش حاجة عاجباه ولا اهلك عاجبينه ولا صاحباتك لازم تعرفيهم بعد كدة ولبسك مش عاجبه ولازم تغيري ستايل لبسك وشغلك لا لازم تسيبيه وبدأت الأوامر وبدأت المعاملة تتغير والوش التاني بان فجأة سواء تاني يوم جواز او تاني شهر او تاني سنة على حسب هو بيستفيد منك ايه او خايف من اهلك اد ايه وعوامل كتير بتتدخل في المدة اللي بيفضل فيها محترم ، المهم ان هو كان زي ما انتيب تتمني وكان بيعبر وكان شبه الاسوياء وفجأة بقى من عيلة جافة ومش بيعرف يعبر وماعندوش صبر ومش فاضي ، اللي تشوفي منه الكلام دة والتغير دة بعد الجواز مش لازم تسميه لا نرجسي ولا غيره بس افهمي انك مع شخص متلاعب وكداب ومخادع وملوش امان ابدا والشخص اللي بالاوصاف دي انتي مش محتاجة منه مشاعر لانها لو اتوجدت فهي مزيفة ،طيب نعمل ايه نبدأ نعالج نفسنا ونتوجه للناس اللي مشاعرها سوية ومش مكبوتة نبدأ نعلم أولادنا ازاي يعبروا عن مشاعرهم ونعبر لهم احنا عن مشاعرنا ونتلمش حوالينا الناس المتعاطفة والناس اللي مشاعرها شغالة ونقرب منهم ونتعلم منهم نعبر عن مشاعرنا ازاي بعد ماكبتها النرجسي ، انتي محتاجة تتعلمي مع اولادك ازاي التعبير عن المشاعر بيزود جاذبية الشخص وبيخليه مشرق ومبتهج وسعيد ، قولي لابنك انك بتحبيه وقولي لبنتك انك بتحبيها قربي منهم وعلميهم اد ايه المشاعر مهمة والتعبير عنها اهم
#صحةـنفسية #القوة #الاكتئاب #النرجسي #النرجسية
27 авг 2024