الردود الصارمة في حالة التهديد
طبعا الردود مش اثناء المعارك خالص بعد ماتهدا العاصفة
شوفي كل حالة ولازم حتختلف عن التانية في موضوع الردود الصارمة على النرجسي ، الحالة اللي تعافت بس هي اللي حتقدر ترد ردود صارمة وحتكون عندها القوة اللي توقفها قصاده بدون خوف لا منه ولا من الانفصال عنه ولا من انقطاع رزقها ورزق أولادها . مش دة اللي بقصده بان كل حالة تختلف عن التانية اللي بقصده ان كل واحدة وشخصية جوزها وايه نقط الضعف اللي عنده اللي تخليها تكون ردودها صارمة وكاتمة . يعني ايه ؟ يعني مثلا لما الزوج يكون كبر وضعف صحيا وجنسيا بتكون الردود مختلفة عن لو الزوج في عنفوان شبابه ، والزوج اللي ممكن يضرب حتكون الردود عليه غير الزوج اللي بيتعامل بلسانه وعنيه وهكذا ، فانا حقول لك ردود صارمة من ارض الواقع يعني اما انا جربتها مع الحالات او الحالات جربوها لوحدهم ونجحت وكل واحدة تاخد اللي يناسبها ،وطبعا كل رد على حسب هو بيهددك بإيه ،عادة النرجسي بيهدد بالطلاق وقطع المصروف والزواج التاني وانه ياخد الأولاد وعدم المرواح عن اهلك واقعدي من الشغل . حناخد تهديد تهديد ونقول الردود المحتملة عليه
أولا التهديد بالطلاق خصوصا لما يكون دائم ومستمر وبكل الطرق والأساليب دة المفروض الرد عليه يكون ازاي ؟ فيه حالة النرجسي كان كبر وضعف وكان ردها كالاتي : شوف احنا الاتنين مش عايزين نتطلق وكل واحد فينا له أسبابه انت مش عايز الناس تقول بعد ماكبروا اتطلقوا ازاي ،انت حتعمل حساب الناس وزمايلك واهلك والبوابين اللي في الشارع ، وانا حعمل حساب اولادي واني لو اتطلقت حبعد عنهم يعني احنا الاتنين بيتنا من ازاز فاحسن مانهددش بعض بالموضوع دة عشان احنا الاتنين مش اد تنفيذه ، وقد كان ،فعلا ماهددش تاني بالطلاق بقاله سنتين تقريبا بالرغم من انه كان اقل موقف يهددها بالطلاق ، خدي بالك. كل نرجسي عنده أسباب لعدم رغبته في الطلاق وانتي اكيد عارفاها لانه لو يقدر يطلق مش حيهدد حيطلق بدون تهديد فانتي تقدري تصيغي رد مشابه للرد دة على حسب وضع جوزك ،بس خدي بالك الكلام دة مايتقالش اثناء المعركة لا خالص احنا متفقين ان اثناء المعركة بتسكتي تماما لحد ما يسكت تماما ويهدى وييجي يصالحك او يحصل أي كلام بينكم ساعتها بتقولي الرد بتاعك
طيب ممكن حالة تانية ماعندهاش مشكلة انها تاخد أولادها وتبعد عنه وامكانياتها المادية عالية بس مترددة في موضوع الطلاق فطبيعي يكون ردها بالسلامة ياريت تطلق وبيكون رده اخلعيني فالمفروض يكون ردها وخلعك ليه انا مش عايزة اتطلق انا مبسوطة كدة وانت اللي مش عاجبك حالي فانت اللي تخلع مش انا وطبعا دة حيحاول يضغط عليها بعدها من باب التطفيش فلما بتوصل للنهاية مهما كانت مترددة في الاخر بتاخد قرار الطلاق او الخلع
وفيه حالة عديمة الحيلة تماما ولاتقدر ترد ولا تقدر تطلق ودي لازم يكون ردها وافوض امري الى الله ان الله بصير بالعباد وبس تسيبه وتمشي واذا زود في الكلام تقول له اعمل اللي انت عايزه وانا وكلت ربنا المحامي بتاعي روح بقى شوف انت حتوكل مين وتسكت تماما مهما قال بعد الكلمتين دول لانه ممكن يقول لها كلام فيه كفر فهي ماتردش ولا تزق في اتجاه زيادة الكلام عشان ايه عشان "ولا تسبوا الذين يدعون من دون الله فيسبوا الله عدوًا بغير علم" لانهم أحيانا بيكونوا والعياذ بالله اخوان الشياطين ،
طيب لما يهدد بالزواج التاني غالبا بيكون عايز يضايقك ويذلك لانه لو عايز يتجوز حيتجوز مش حيهددك ولا حيعرفك فانتي لازم تكوني متيقنة ان المكتوب حيصير مهما حاولتي تغيريه فانتي لو من الناس اللي متقدرش تتحمل وضع زي دة فلازم يكون ردك واضح وصريح انت من حقك تتجوز أربعة وانا كمان من حقي اتطلق اذا تضررت من جوازك وماقدرتش اتحمله فعايز تتجوز اتجوز لكن تطلقني قبلها وبس ولا كلمة بعد كدة وماتدخليش ابدا ابدا في حوارات بعدها ولا تتفاعلي مع الكلام عن الموضوع دة نهائيا ولو حصل واتجوز فعلا حيسهل عليكي ترفعي طلاق للضرر وتاخدي حقوقك ، اما لو ماتقدريش ع الطلاق فممكن تشترطي عليه انه مايكونش بينكم أي حقوق زوجية من أي نوع غير انه يصرف على أولاده وانتي حتربيهم له وبس (طبعا اذا دة حيريحك لان فيه زوجات ممكن تتقبل الموضوع وتتعايش معاه فدي مش بتشترط ) بعض الحالت بيكون هو أصلا مش مكفيها وبيكون ردها قوي بتقول له كفيني الأول وبعدين اتجوز زي ما انت عايز ، او هي ناقصة فضايح (يعني حد تاني حيعرف تقصيرك) وكلام من هذا القبيل والنوع دة من الأزواج بيكون حاسس بضعفه وعايز يقول لك ان انتي السبب في الضعف دة فهو حيدور على واحدة تظبطه عشان انتي العيب فيكي فلما بيكون الرد حاد بالطريقة دي بيعمل أحيانا صدمة للنرجسي وبيهزه جدا ،لكن انا مانصحش بالردود دي الا اذا كنتي آمنة على نفسك من ردود فعله
اما قطع المصروف بقي فدة رده الوحيد التهديد بالفضح والناس تعرف انه مجوع عياله او التهديد بالمحاكم ورفع النفقة ودة في حالة انه فعلا بينفذ وبيقطع الفلوس فترة او انك تهدديه انك حتنزلي شغل غصب عنه ومش حتسمعي كلامه لانه اذا ماصرفش عليكي ملوش عليكي قوامة دة برأي الشيوخ
26 авг 2024