#احد_زرگر
خالهٕ زُلفن وول مُیون دِل تهٕ لو لو
نالهٕ فریاد بوزِ وأصِل تہٕ لو لو
زالهٕ عشقٕنہِ لئگۍ کأمِل تہٕ لو لو
نالهٕ فریاد بوزِ وأصل تہٕ لو لو
نار اندری گونڈنم تندُورس
کار میون کیاه زانہ کأمِل تہٕ لو لو
رونهِ وایم پیٹھ ژون مضرابن
شرونی شرونی گوم دون حأیِل تهٕ لولو
گاش زألِتھ ستھ گاش ہاوان گاش
چاش وُچھان صاحبِ دِل تهٕ لو لو
چالہٕ کسبچهٕ کرٔی کرٔی کالہٕ سودرس
لالہٕ انبر آم حأصِل تہٕ لو لو
شن طرفن چُھم محیط نورٕ دریاد
دون عینن ستؠ شأمِل تہٕ لو لو
سُے ظأہر بأطن چشمن گاش
ناو ییمؠ سُند ماهِ کأمِل تہٕ لو لو
بألؠ نو ستھ زألؠ ہار گیٔم نیرِتھ
ڈالؠٔ ادٕ آم عشقهٕ منزِٔل تہٕ لو لو
تور ڈیونٹھُم بے کار زیٖر تہٕ بم
یور عاشقن آمٕژ ٹھل تہٕ لو لو
ونهِ ییلهِ آو یار تس منصورس
کنہِ لاینهِ آس جاہِل تہٕ لو لو
بے کینہہ نے کینہنس منز کینژھاہ
چُھے قادری میون سِلسِل تہٕ لو لو
احؔد زرگر پأنؠ پانس چُھے مُشتاق
سُہ چُھ پانس پانہٕ مایِل تہٕ لو لو
کلام احد زرگر
گلوکار عبدالرشید حافظ
15 окт 2024
