کٔرِتھ کأفر میہ نیوو ایمان عشقن 

کٔرِتھ کأفر میہ نیوو ایمان عشقن
جٔرِتھ سیٖنَس میہ تھوۍنم کان عشقن
دھرم دیں نَے چُھ مذھب عشقَسےٕ کانہہ
حرم گِرجَے میہ نیوو بُتخان عشقن
بنگَے چیتھ چنگہٕ نَے سازن وزُن ہیوت
جنگَے دۄن ہندِ یہِ زولُم تران عشقن
زُلُف خالُک یہِ زِنداں رنگِ اَسوٓد
قلف مُژرِتھ میہ کٔرنم زان عشقن
خمارا چُھم عجب چے چے بہ تشنَے
شمارا چھا دیتُم عرفان عشقن
دَرس پألِتھ میہ زأنِم نٔنۍ حقیقت
پَرس پانس میہ کۅر یکسان عشقن
نہ دوزخ ، جنتکُے مےٚ کانہہ ہوَس چُھم
بہ چُھس کۆرمُت مۄتُے مستان عشقن
مٔرِتھ صوفی یہِ گوو نا زندٕ پانَے
سٔرِتھ دِیُتنم مۄئے حیوان عشقن
KALAAM : NISAR AHMD SUFI
SINGER: NAZIR NISHATI
‪@nisarsufi‬