Маңғыстау облысында малмен ғана күн көріп отырған Қызан мен Ақшымырау ауылынының тұрғындарына қуаңшылықтың кесірі қатты тиіп отыр. Өткен аптада ғана ауыл шаруашылығы министрлігі 204 миллион теңге бөліп, өңірдегі шаруаларды жем-шөппен жарылқаймыз деген еді. Алайда облыс орталығынан шалғай жатқан бұл ауылдарға көмек әлі жетпепті. Тұрғындар малды аман алып қалуға 204 милиион теңгенің өзі аздық ететінін айтады.
МАХАББАТ НҰРЖАНҚЫЗЫ, тілші:
- Біз тұрған мына Қызан ауылында 2 мыңға жуық халық бар. Осы ауылдың тұрғынының бәрі қазір тек қана малмен күнелтіп отыр. Ал өңірді жайлаған қуаңшылық бүкіл маңғыстаулықтардың басты мәселесіне айналды. Ал менің артымда тұрған мына жылқылардың қазіргі күйі осы. Басқа өңірден жеткізілген қымбат шөпті де жеп семіріп жатқан жоқ.
ӘЛІМБАЙ АМАНОВ, Қызан ауылының тұрғыны:
- Малымды аман алып қалам деп. Басы-көзіне қарамай, пенсиясын, ақшасын соған салып, күнелтіп жасап жатыр. Өлетіні өліп жатыр далада.
БАЛАТӨРЕ АЛТЫБАЕВ, Қызан ауылының тұрғыны:
- 72 жыл болды бірінші рет көрдім мынадай қуаңшылықты. Жұтты көргеніміз жоқ еді. Қуаңшылық, жоқшылық бәрі қат-қабат болып тұр ғой.
Бұған дейін ауыл шаруашылығы министрлігі Маңғыстау өңіріндегі малдарды аман алып қалуға 204 миллион теңге қаражат бөлінгенін айтқан еді. Сол ақша есебінен Маңғыстау, Түпқараған, Мұнайлы, Қарақия ауданы мен Жаңаөзен қаласының әр қайсысына 130 тонна арпа жеткізілген. Алайда көмек, шалғайдағы шаруаларға тимепті. Ауыл әкімі облыс әкімдігінен бөлінген қаражатқа алынатын жем-шөпті жеткізу үшін өтінім жіберіп қойғанын айтады. Мал азығын тасымалдаумен айналысып жатқан өңірдегі «Каспий» әлеуметтік кәсіпкерлік корпорациясы тауарды тек аудан орталықтарына ғана жөнелтіпті. Алайда аудан орталығынан 110 шақырым жерде орналасқан Қызан ауылының тұрғындарына оны өздігінен тасу қиын.
ҚОНАЙ СҮЛЕЙМЕНОВ, Қызан ауылының әкімі:
- Біз енді халықтан керек адамдардың тізімін шығарамыз. Соған байланысты аудандық ауыл шаруашылық бөліміне ұсынысымызды түсіреміз шөп керек деп.
Ал ауыл шаруашылығы министрлігі өңірдегі жағдайды жергілікті әкімдік уақытында хабарламағандықтан қазіргі ахуалдың қиындағанын айтады.
ҚАЙРАТ МУТАЕВ, Ауыл шаруашылығы министрлігі департамент директорының орынбасары:
- Өлген малға қаржы қарастырылмайды. Тек қазір бар малды сақтауға қаражат бөлінеді. Аудандық әкімдіктер қуаңшылық жөнінде ертерек хабарламады. Жағдай ушыққанша күтпеу керек еді.
Қызан ауылында құрғақ жерден азық таппай қырылып қалған малдан қалғаны 5500 жылқы, 2700 түйе, 13 мың қой мен ешкі. Енді қалған малды сақтап қалу үшін шалғайдағы шаруалар үкіметтен қолжетімді бағада жем мен шөпті ауылға дейін тасымалдауды ұйымдастыруын сұрайды.
Махаббат Нұржанқызы
Бізді әлеуметтік желіде оқыңыздар:
RU-vid - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#қуаңшылық #Маңғыстау #жұт
20 июн 2021
