ازاي تحبي نفسك تاني بعد التعافي من صدمة النرجسي ؟. .... كوثر سند 

ازاي ترجعي تحبي نفسك بعد ماتخلصي من صدمة النرجسي و بعد ماتخرجي من علاقة سامة ؟
بعد ما تنهي علاقتك بالنرجسي سواء بالطلاق او بالانفصال النفسي وبعد ماتكتشفي انك عايشة مع شخص غريب مستخبي ورا القناع اللي انتي حبيتيه ، التجربة دي دي بتكون مؤلمة جدا وبتخليكي بتشوفي الحياة بشكل مختلف تماما ، ومش بس الحياة والناس لا دة انتي بتشوفي نفسك بشكل مختلف وكأنك بتتعرفي على نفسك من اول وجديد وبتبدأي تشوفي نقاط ضعفك ونقاط قوتك بوضوح بعد ماكنتي مش شايفة نفسك اصلا . رؤيتك لنفسك دي اول خطوة في طريق الرجوع لها ولو انك في الاول بتشوفي حد تاني خالص غير اللي انتي كنتي عارفاه قبل ماترتبطي بالنرجسي ، بتشوفي شخصية ضعيفة معندهاش ثقة بنفسها دبلانة ومطفية ومش بعيد مريضة او وزنها زاد ٥٠ كيلو او خست وبقت نحيفة جدا ووشها كبر عشرين سنة . كل دة بيكون في المراية عند اول نظرة بعد الصدمة ، بس مش دي الحقيقة دي صورة بتبين اعراض الصدمة ولما تتعالجي حترجعي تاني زي ماكنتي واحسن . طيب ازاي ؟ اول حاجة لازم تحبي نفسك عشان تحلي كل مشاكلك معاها وحتحبيها ازاي وانتي اصبحتي غريبة عنها وانتي بقيتي متعرفيهاش ؟ هو فيه حد يقدر يحب حد ميعرفوش ؟ دة حالك دلوقتي انتي مش عارفة مين دي اللي في المراية زي اللي بيقول انا مش عارفني 😄، طيب يبقى اول خطوة لازم نعملها انك تعرفي نفسي . حقولك ازاي :
اول حاجة حتعملي التمرين اللي حقوله لكي دلوقتي وخليكي معايا خطوة خطوة
امسكي ورقة وقلم وجاوبي على الاسئلة : بعد الصدمة
١- ايه اللي اتعلمتي انه مهم فعلا بالنسبة لك ؟ ( فيه ناس تقول اتعلمت ان المهم فعلا هو القرب من ربنا ، وناس تقول المهم اني مهملش نفسي ، وناس تقول احمي نفسي وناس تقول احمي اولادي ) انتي حتقولي ايه ؟
٢- ازاي اتغيرت اولوياتك وهل اصبحت اكتر وضوحا ؟ (هل لسة هو اول اولويتاتك ، ولا اولادك ولا نفسك) ؟
٣- هل اتفاجئتي بنفسك بتعملي ردود افعال عاطفية مكنتيش بتعمليها قبل كدة او بتعمليها بشكل مبالغ فيه ؟ ٠( غضب ، حزن ، قلق ، فرح ، بكاء ، …..) دي امثلة لردود الافعال العاطفية
٤- ردود الافعال دي فهمتك ايه عن نفسك؟ ( مكبوتة ، ضعيفة ، قوية ، مش فاهمة ، صبورة ، متنازلة وخاضعة ، ذليلة ، عصبية ، …..)
٥- ايه التغير اللي لاحظتي انه حصل في آرائك ومعتقداتك ؟
٦- ايه اللي قبل الصدمة كنتي متأكدة منه ودلوقتي بتتسائلي عنه وبقيتي مش متأكدة منه ابدا؟
٧- ايه اللي عرفيته عن اصدقائك ومكنتيش عارفاه قبل كدة ؟
٨- ايه القرارات اللي اخدتيها في حياتك ودلوقتي بتعيدي تقييمها ؟ ( اختيارات العمل ، ترك العمل ، مكان السكن ، سفرك ، بقائك ، نشاطاتك ، علاقاتك ، علاقتك بأولادك وطريقة تفاعلك معاهم ، وكذلك والديكي واخوتك ،…….)
بعد ماتجاوبي ع الاسئلة حتلاقي فيه تغيير في الافكار والمشاعر وانتي ممكن تلاقي نفسك خايفة او تحسي برهبة من التغيير دة ودة بنشوفه في الحالات لما تقول شتمته وانا عمري ماكنت كدة ، بقيت بكرهه وانا عمري ماكرهت حد ، بقيت عصبية جدا وانا كنت هادية جدا ، وهكذا ، وبتكون في حالة فزع من التغيير اللي بيحصل في شخصيتها او اللي حصل من غير ماتحس ، ودا غير تغير المعتقدات واللي للاسف بيوصل ببعض الناس لانكار وجود ربنا اصلا بسبب شدة الضعف وعدم الصبر والتحمل ومن كتر القهر والظلم اللي شافوه .
المهم انتي مفروض دلوقتي تلاحظي مشاعرك بهدوء وبدون ذعر ولا خوف وتتقبلي التغيير ومتخافيش منه وكوني هادية ولطيفة مع نفسك لان التغيير دة والمشاعر المتأججة دي حتهدأ بعد كدة ، هي دلوقتي متأرجحة مابين مبسوطة ومرتاحة انك فهمتي اللي بيحصل فيكي وانك انفصلتي وبقيتي ملك نفسك ولو حتى فضلتي عايشة معاه وبين انك حزينة ومكتئبة وبتبكي ، وكل دة حياخد وقته وبعد كدة حيحصل اتزان ، المهم انك متستغرقيش في الحزن ولازم تواجهي التغيير دة بهدوء وتتقبلي الايجابي وتقاومي السلبي منه
التمرين اللي قلتهولك دة لما تعمليه حتفهمي نفسك اكتر ، طيب وبعدين كدة خلاص؟ لا طبعا لسة سلسلة حلقات طويلة ان شاء الله حنوصل فيها للثقة في النفس والقوة ووضع الحدود وكيفية التعامل مع الناس بشكل صحي دي الحلقة الاولى في السلسلة دي وان شاء الله نكمل الحلقات الجاية
اكونت الفيس بوك
www.facebook.c...
جروب ادرس عدوك النرجسي
/ kawthersanad11

Кино