الناس اللي عندهم مناعة ضد النرجسي دول شكلهم ايه ؟ وازاي عندهم المناعة دي ؟
١- اول حاجة واهم حاجة بتميزهم الثقة بالنفس ، عندهم ثقة قوية جدا بنفسهم وعارفين حقيقة نفسهم ومش بيتأثروا بكلام النرجسي سواء مدح او ذم ودايما يقولوا له اوك انت دة تفكيرك وانا ليا تفكير مختلف ، عادي وكل واحد من حقه يتفق او يختلف مع التاني
٢- عارفين هم عايزين ايه ومش عايزين ايه لانهم فاهمين نفسهم كويس وبالتالي مش بيعملوا غير اللي هم عايزين يعملوه واللي مش حابين يعملوه مش بيعملوه
٣- هم مش بيكرهوا النرجسي كشخص ( لو تفتكروا في حلقة : امتى تعرفي انك تعافيتي تماما من العلاقة السامة اللي كنتي فيها ومستعدة تعيشي حياة طبيعية) قلنا ايه قلنا ان من علامات التعافي انك متحسيش ناحيته بأي حاجة لا حب ولا كره . هم كدة هم ممكن يكرهوا تصرفاته وافعاله لكن ميكرهوش شخصه
٤- عندهم حدود صحية وقوية وبيعرفوا يقولوا لا بدون اي احساس بالذنب
٥- هم حتى لو مش عارفين ان الشخص اللي بيتعاملوا معاه نرجسي او لا هم طبيعتهم مبتقبلش التقليل والتلاعب والاستغلال وفي نفس الوقت فاهمين انه حد مش مظبوط وفيه حاجة غلط ومش واعي للي بيعمله ومش بيحاولوا يغيروه ولا بياخدوا الموضوع بشكل شخصي ابدا
٦- عارفين انهم لو عملوا نوكونتاكت حيفقدوا النرجسي عشان كدة مبيدخلوش فيه الا اذا هو اللي بدأه
٧- مبيفقدوش احساسهم بنفسهم ولا بيفقدوا طاقتهم لان النرجسي مبيقدرش يستهلكهم عشان مش بيعرف يدخلهم في دايرة الالاعيب بتاعته لانهم فاهمينه كويس
طيب نتعلم ايه من الناس دي ؟
١- لما بتتعاملي مع النرجسي مينفعش تاخدي الامور بشكل شخصي ( اللي بيحصل دة مش عشان انا وحشة ، لا دة عشان انت عندك مشكلة مع نفسك)
٢- لو ناوية تعيشي معاه متحاوليش تغيريه ، اقبليه زي ماهو ، غيري نفسك وحطي حدودك ووقفيه براها
٣- حافظي على نفسك وخدي خطوة لورا ، يعني خلي فيه مسافة ثابتة بينك وبينه ومتسمحيش له انه يلعب في المسافة دي ويحاول يقللها بالهوفرينج ، اقبلي الهوفرينج بس برضه خلي المسافة ، ازاي ؟ بانك متحسسيهوش انك اتضحك عليكي بالهوفرينج وتجري تتدلقي عليه ولا تحسسيه انك مش قابلة الهوفرينج وتصديه ، يعني اوزني خدي اللي يديهولك ومتحسسيهوش انك راضية جدا ، يعني راضية شووية لكن مش اوي يعني متاخدش عليا
٤- متخافيش من الغضب النرجسي لانه اصلا ناتج عن الضعف الداخلي شوفي حلقة ( ٧ حاجات بتخوف النرجسي جدا وهي السبب الرئيسي للغضب النرجسي) ولو بيمد ايده هدديه
٥- متتوقعيش اي خير من النرجسي ، عيشي حياتك واعملي اللي انتي عايزاه ومتفكريش فيه ولا هو بيفكر في ايه ولا عايز ايه ولا حيعمل ايه ، كوني عطوففة مع نفسك واتعلمي تهزي كتافك وتمشي ، بطلي تحاولي تسعديه لانه مش حيسعد مهما عملتي ، ومتسمعيش كلام حد يقولك ان العلاقة مع النرجسي علاقة طبيعي وكل الرجالة كدة لان مش كل الرجالة كدة
اكونت الفيس بوك
profile.php?...
جروب ادرس عدوك النرجسي
/ kawthersanad11
16 июл 2024