٥ حاجات بيكرهها النرجسي وكل الناس بتحبها
١- الاجازات والاحتفالات والمناسبات العامة ، طبعا اتكلمنا في الموضوع دة كتير وشرحنا هو ليه مش بيحب الاحتفالات والمناسبات العامة ولا الخاصة عشان الاضواء مش بتكون عليه والناس بتكون مشغولة عنه وخصوصا انتي بتكوني مشغولة عنه ،اما الاجازات فقلنا انها بتحرمه من مصادر الوقود سواد اللي في شغله او اللي ف منطقته لو انتوا حتقضوا الاجازة برة بلدكم وكمان هو بيخاف ومبيحبش يتواجد في مكان محدش يعرفه فيه عشان برضه الوقود
المفروض انك فاهمة الكلام دة ومفروض متتوقعيش منه اي اسعاد لكي في اي مناسبة ولا اي سفرية ومش معني انك متتوقعيش انك تتقبلي الوضع وانتي ساكتة وكابتة نفسك لا نهائي المطلوب منك انك تدركي انه حد مش طبيعي وعنده خلل في تفكيره ومشاعره وبالتالي مش مفروض تتوقعي منه الحاجة اللي هو مبيعرفش يعملها يعني بالظبط زي ماتتوقعي من القطة انها تسمع لك وتكلمك ، هي معندهاش القدرة علي دة فانتي مفروض متزعليش منها لما متعملوش او بمعنى اصح متزعليش على نفسك وتحسي انك متستاهليش ان القطة تكلمك عشان انتي فيكي عيب وانتي مش واخدة بالك ان المشكلة في القطة مش فيكي
٢- تاني حاجة النرجسي بيكرهها السعادة ! انه يشوف اي حد سعيد خصوصا انتي ، اكيد لاحظتي انه لو شافك سعيدة ومبسوطة لازم ينكد عليكي بأي شكل ، شوفي انتي لو دخلت عليكي حشرة بتتصرفي ازاي ؟ بتجري تجيبي اي حاجة تموتيها بيها وتتخلصي منها بسبب الخوف والاشمئزاز منها ، دة نفس احساس النرجسي بالسعادة لما يشوفها في اللي ادامه ، ايه دة ليه كدة؟ السعادة بتهدد النرجسي ، هو مش بيعرف يحسها وبالتالي بيشوف ان انتي عندك ميزة عنه انتي بتعرفي تعيشي وتحسي حاجة حلوة هو مش قادر يحسها ولا يعيشها ودة بيكشفه لنفسه وبينشط عنده الشعور بالضعف والهشاشة ودة بيحسسه انه اقل منك وهو ميقدرش يستحمل الاحساس دة فلازم يخلص من سعادتك باقصى سرعة كنوع من انواع الدفاع عن النفس
٣- بيكره ان الناس تشوفك كويسة ويشكروا فيكي ويحبوكي ودة طبعا بيهدد الانا بتاعته ، الناس الطبيعية بتنبسط لما حد يشكر في شريكها او اولادها لكن النرجسي لا يا اما تشكروا فيه يا اما تشكروا فيه وكون اي حد يشكر فيكي ادامه فهو بيترجم دة انه بينفي عنه الشكر دة وبالتالي بيعتبره نقد له فبينشط العداوة وبيستعديه ويبدأ النرجسي يهاجمه واذا مقدرش يهاجمه عشان شكله وعشان ميتكشفش حيعمل ايه حيستنى لما يتقفل الباب عليكم ويهاجمك انتي ويحاول يزرع جواكي ان الكلام اللي اتقال دة كله مجاملة ومش حقيقي عشان متحسيش بنفسك طبعا
٤- النجاح ، النرجسي بيكره ان اي حد ينجح الا اذا كان حيحسن صورته يعني اولاده ينجحوا عشان يتقال اولاد فلان لكن اذا حس ان نجاح اولاده حيخرجهم من تحت سيطرته حيكره النجاح دة طبعا وكمان اذا النجاح دة حيبين ان اولاده احسن منه وحياخدوا اللقطة منه برضه حيكره النجاح دة وحيبدأ ينتقم من اولاده وفي نفس الوقت يفتخر بنجاحهم وياخد بيه وقود نرجسي من المجتمع ، اما انتي نجاحك بالنسبة له اذا حيستفيد منه او مش حيستفيد منه فهو لازم ينتقم منك بسببه ولازم يحطم نفسيتك ويقلل منك ومن نجاحاتك عشان متفكريش انك حتكوني احسن منه ابدا ولو قدر يعطلك ويمنعك انك تنجحي حيعمل دة ،
٥- طبعا بيكره حب اولادك لكي وتعلقهم بيكي وانبساطهم في وجودك وبيكره حب اهلك واخواتك لكي وحبك لهم واستمتاعك بالوقت معاهم وفرحتكم باللمة ومشاعركم الجميلة ، ليه بيكره دة بالرغم من ان الناس الطبيعية بتكون فعلا سعيدة لما يكون علاقة الاولاد بشريكهم علاقة جيدة وصحية ؟ النرجسي مش بيعرف يحس الكلام دة وفي نفس الوقت بيغير منك مجرد انك بتحسي الحب وبتتحبي بصدق ودي حاجة هو مش بيقدر يوصلها ولا يحسها فدة برضه بيحسسه بالنقص والضعف والهشاشة ويخليه حاسس انه اقل منك لانك عندك حاجة مش عنده ، سام فاكنين في احد اللقاءات قال ان المشاعر بالنسبة له غير متاح له الوصول اليها هي مدفونة في العماق وهو ميعرفش يوصل لها ماعدا مشاعر الغضب والكره والمشاعر السلبية هو نرجسي ظاهر خبيث وعارف ومدرك تماما لمشاكله ولمرضه ، من المفترض ان اللي بيدرك مرضه بيكون عنده القدرة على التعافي لكن واضح ان فاكنين مبسوط كدة وبيسترزق
اكونت الفيس بوك
www.facebook.c...
جروب ادرس عدوك النرجسي
/ kawthersanad11
11 окт 2024