کتھ بوزٕنۍ تگہِ صاحبِ حالس ( احد زرگر) 

#احد_زرگر
گتھ کرۍ کرۍ قط پیوم زلف و خالس
کتھ بوزنۍ تگہ صاحب حالس
خط ہلۍ پییم نامہ اعمالس
کتھ بوزنۍ تگہ صاحب حالس
ژھۆٹ نکتہ رۆٹ میے گژھ ژینِتھ
ژۆٹ صاف تھاو پۆٹ کٕن لورِ مینِتھ
گۆٹ کأسِتھ نۆٹ ویپہِ منز پیالس
کتھ بوزنۍ تگہ صاحب حالس
خانہ پنٛنُے پانہ زال بن مقبول
جانور لاگ لٔکہٕ ہندِ مرِ تراو ٹھوٗل
آنسٕے منز پان کٕن بے خالس
کتھ بوزنۍ تگہ صاحب حالس
آیہ آیہ کھن بدنس آیہ فرقان
جایہ جایہ ؤچھ ژھایہ رۆس ماہ تابان
رایہ بد تراو سیتۍ چھکھ لایزالس
کتھ بوزنۍ تگہ صاحب حالس
سوٕ سوٕ گژھ گنزران نقصاں سوٗد
پوٕ پوٕ گژھ انزران بود نابود
شوٕ شِو کر زیو دِتھ روز تالس
کتھ بوزنۍ تگہ صاحب حالس
کرٛے تہ انصاف ترٛأوِتھ ژھانٛڈُن دے
حے سرٕ کر ژلہِ یو مرنُن بے
کھے غفلت دٕے چھے اشکالس
کتھ بوزنۍ تگہ صاحب حالس
زیو اکھ تے دل بیاکھ تھاو محکم
گُل چأوِتھ سپدکھ کُل محرم
میُٚل سپدی لامہ سیتۍ جیم دالس
کتھ بوزنۍ تگہ صاحب حالس
زپھہ مال چھے دانہ دانہ تراو زألِتھ
کف دِتھ روز تنہا وعدہ پألِتھ
تپھ مۄکلاو دامانس تہ نالس
کتھ بوزنۍ تگہ صاحب حالس
تمعُک لباس از خۄد بیٖرون تراو
سمعُک آن برونٹھ کنہِ رو بہ رو تھاو
جمعُک جمع منز بسِتھ مثقالس
کتھ بوزنۍ تگہ صاحب حالس
با پیر گۆو سُے ییٚمۍ سرٕ کۆر سیٖر
لا محنت زأنۍ زیٚن عین بے پیر
کیاہ کرِ اتھ چھۆنۍسٕے قیل و قالس
کتھ بوزنۍ تگہ صاحب حالس
کینٛہہ نے اوس لچھ بدۍ ناو کتھ پیوس
رچھ کرمس یہُے گوم دشمن دوس
احؔد زرگر مۆت حسن جمالس
کتھ بوزنۍ تگہ صاحب حالس
گلوکار عبدل رشید حأفظ