“Факт ва Фикр”нинг “Муллаларнинг ўз дини бор”, деб номланган 72-чи сонида, “Исломий ва демократик давлат. Ўхшашликлар ва айирмалар”, деб номаланган 73-чи сонида ҳамда “Ўзимиз тайёр эмасмиз (Асл Исломий давлат қуришдаги тўсиқлар ҳақида)”, деб номланган 74-сонида Ислом дунёси 1000-1200 йиллар давомида Қуръондан четлашиб, унга зид ҳадисларга ва уйдирма ривоятларга эргашгани ҳамда бунинг натижасида жаҳолат ва қолоқлик ботқоғига тушгани ҳақида гапирган эдим.
Ана шу кўрсатувларда Аллоҳнинг Қуръонидаги ҳукмларга тескари ҳадис ва ривоятларни “сахиҳ” тамғаси ила жадаллик билан тарқатиш авж олгани, бу ишлар уммавий ва аббосий ҳалифаларга Ислом дунёсида монархияни қонунуийлаштириш учун керак бўлгани ҳақида етарли далиллар келтирган эдим. Бундан ташқари, Ислом оламини ғоявий чалкашликларга ҳамда ўзаро низоларга етаклаган уйдирма ҳадис ва ривоятлар Қуръоннинг қайси оятларига зидлигини ҳам далил, факт ва исботлари билан кўрсатиб бердим.
Лекин шунча далил ва факт келтирганимга қарамасдан, баъзи мутаассиб диндорларимиз ўша кўрсатувлар тагида қуруқ демагогиялардан, яъни исботсиз иддаолардан ҳамда ҳақоратлардан иборат шарҳлар қолдиришди.
Бугунги кўрсатувни ана шу демагог ва фанатик муллаларга жавоб сифатида тайёрладим. Яъни, динимизга олиб кирилиб, шариат қонуни, яъни мажбурият даражасига олиб чиқилган эртак ва афсоналар хусусида яна бир кўрсатув тайёрлашга мажбур бўлдим. Аслида “Факт ва Фикр”нинг бугунги сони “Комхоний давлат қандай давлат?” деб номланиб, золим режимларнинг янги ва гибрид турига бағишланиши керак эди.
Начора, ортда қолган уч кўрсатув борасида савол, шубҳа ва гумонларга ўрин қолдирмаслик учун “Факт ва Фикр”нинг бугунги сони ҳам уламоларнинг уйдирмачилиги Ислом оламини қандай фалокатларга етаклагани хусусида бўлади.
Ушбу кўрсатувни тайёрлашда қўлланилган АДАБИЁТ ВА МАНБАЛАР СИРАСИ:
1. Қуръони Карим. Ўзбекча маъноларининг таржимаси. Аллоуддин Мансур таржимаси ва тафсири
2. Муҳаммад ибн Жарир Табарий, “Тариx ат-Табарий”
3. Иззуддин Ибн Асир, “Ал-Комил фит-Тариx”
4. Муҳаммад ибн Аҳмад ат-Туркманий/Аз-Заҳабий, “Тазкират ул-Ҳуффоз”
5. Муҳаммад ибн Аҳмад ат-Туркманий/Аз-Заҳабий, “Сияр Олам ан-Нубала”
6. Ибн Саъд ал-Бағдодий, “Китоб ат-Табақот ал-Қубро”
7. Бaқий ибн Мaҳлад, “Муснад”
8. Ибн Абул-Ҳадид, “Шарҳу Наҳжул-балоға”
9. Имадуддин Ибн ал-Касир, “Ал-Бидоя ван-Ниҳоя”
10. Ибн Aбдул Барр, “Жомеъ-ул-Баёнил-Илм”
11. Имом Бухорий, “Фазоил ул-Қуръон”
12. Имом Муслим, “Фазоил ус-Саҳоба”
13. Имом Абу Довуд, “Ал-Фитан”
14. Имом Термизий, “Ал-Фитан”
15. Sunnah.Com веб сайти
21 окт 2024